Nótt inn­brota í Laugardal: „Ömurlegt að það sé verið að fara inn í bílana en vanda­málið er stærra“

Oddvar Haukur Árnason, íbúi í Rauðalæk, birti færslu í Facebook-hópnum Laugarneshverfi með myndbandi af konu í hvítri úlpu taka í hurðarhúna tveggja bíla og svipast um á lóð í Rauðalæk. Færslan vakti töluverða athygli og skrifaði fjölda íbúa ummæli við hana

Ilmur Kristjánsdóttir, leikkona, sagði í ummælum að brotist hefði verið inn í tvo bíla við hús hennar á Rauðalæk og myndlistarkonan Hanna frá Jaðri sagði að öllum sólgleraugum hefði verið stolið úr hennar bíl. Þá taldi Daníela Gabríeludóttir víst að konan í myndbandinu væri í úlpu sem hefði verið stolið úr bíl í miðbænum tveimur dögum fyrr.

Aðrir íbúar furðuðu sig hins vegar á því að verið væri að taka upp hús og bíla í götunni.

„Þetta er mjög slæmt EN eru myndavélar að vakta okkur hér í götunni? Mér finnst það ógnvekjandi ... stóri bróðir alls staðar,“ skrifaði Ragnheiður Sverrisdóttir við færsluna. Oddvar svaraði henni og sagði svo ekki vera, einungis væri um að ræða upptöku úr bíl.

Marta María Jónsdóttir tók undir áhyggjur Ragnheiðar og sagði myndbandsupptöku sem þessa vera á gráu svæði varðandi friðhelgi nágranna.

Margir nágrannar haft samband

„Það voru nokkrir sem lentu í að það var brotist inn,“ sagði Oddvar í samtali við fréttastofu. „Ég var með eina bílinn sem var með myndavél en hún fór ekkert inn í okkar bíl því hann var læstur. En hún gekk á röðina, þetta voru einhverjir tugir bíla.“

Oddvar á Teslu sem er með upptökubúnað sem virkjast þegar fólk snertir bílinn eða kemur ákveðið nálægt honum.

„Eina ástæðan fyrir að ég set þetta inn er til að upplýsa aðra og að ef einhver hefur lent í tjóni geti þeir farið til lögreglunnar. Það var eini tilgangurinn því við lentum sem betur fer ekki í neinu tjóni sjálf,“ sagði Oddvar.

Hefurðu rætt við nágranna þína?

„Það eru nokkrir sem hafa haft samband við mig og ég hef látið þá fá þessar upptökur svo þeir geti farið með þetta til lögreglunnar. Því það getur eiginlega ekki annað verið en að þetta sé þessi manneskja,“ sagði hann og bætti við: „Þetta hefur ekki gerst áður, skilst mér.“

Aðrir hafi ekki verið eins heppnir og Oddvar, nágranni Oddvars lenti í því að mikið af verðmætum hafi verið stolið úr vinnubíl.

Sólgleraugu, pappírar og stöng úr skottinu

Marta María býr ofar í Rauðalæknum og lenti í því að brotist var inn í bíl fjölskyldunnar.

„Hún komst inn í bílinn en að okkur bestu vitund var hann læstur. Ég hjóla í vinnuna og tek eftir því að hurðin er ekki alveg lokuð bílstjóramegin. Þá fer ég og kíki inn í hann og sé þá að það er búið að fara í gegnum allan bílinn, taka allt úr hanskahólfinu og stela sólgleraugum,“ sagði Marta við fréttastofu.

Þjófurinn hefði jafnframt tekið alla pappíra og nótur sem voru í bílnum og stöng úr skottinu sem virkar sem tjald til að draga yfir farangur.

„Það voru skór og jakki sem búið var að taka fram í og greinilega máta,“ sagði Marta og bætti við: „Mér finnst eins og hún hafi hreinlega verið í bílnum yfir nóttina. Hún var búin að halla sætinu aftur og búin að taka niður spegilinn.“

Þau hafi hringt í lögregluna sem sagði þeim að taka mynd, ólíklegt væri að eitthvað kæmi út úr því. Marta segir atburðinn fyrst og fremst sorglegan

Umhugsunarvert að mynda húsnæði með þessum hætti

Hins vegar segir Marta myndatökuna hafa vakið mest óþægindi hjá sér.

„Húsið okkar er þarna í mynd, öll hliðin, svefnherbergisgluggi, stofugluggi og svalirnar,“ sagði Marta sem veltir fyrir sér hvort það megi mynda húsnæði fólks með þessum hætti.

„Ég sendi póst á Persónuvernd og spurði hvort það væri heimilað að mynda næsta hús, af því bíllinn er þannig staðsettur,“ sagði Marta sem hefur þó ekki enn fengið svar.

„Mér finnst þetta mjög umhugsunarvert að þessar Teslur séu í alvörunni að mynda mann í hvert einasta skipti sem maður labbar framhjá þeim. Þetta er fáránlegt,“ segir hún.

„Stopp, enginn inn í bíl!“

Ásrún Ágústsdóttir, íbúi í Bugðulæk, lenti einnig í því að brotist var inn í bíl hennar og virðist hann hafa verið notaður sem sprauturými. Hún segir atvikið hluta af stærri vanda.

„Ég er ekki stóra fórnarlambið í þessu máli, þetta er kerfi sem er búið að bregðast þessu fólki algjörlega. Mér finnst það í raun sorglegast,“ sagði hún.

Ásrún hafi verið að fara í vinnuna og með börn sín í skóla um morguninn þegar hún sá fullt af drasli og uppgötvaði að brotist hefði verið inn í bílinn. 

„Stopp, enginn inn í bíl!“ hafi hún þá sagt við börnin á meðan hún gaumgæfði hann. „Það var ónotuð sprautunál, ennþá í pakkanum, þannig maður var að leita hvort það væri eitthvað notað, sem er auðvitað óþægilegt.“

Þá hefði verið blóð í krumpuðum blautþurrkum í bílnum svo hugsanlega hafi einhver sprautað sig í bílnum.

Skorti úrræði fyrir þennan hóp

Áður en Ásrún flutti í Bugðulæk bjó hún á Kleppsvegi. Þar var algengt að fólk hafi verið að reyna að komast inn á stigaganga í húsaskjól og til að sprauta sig.

„Það eru engin úrræði frá hvorki borg né ríki sem eru að hjálpa öllum þeim einstaklingum sem þurfa á því að halda. Þetta er grafalvarlegur fíknisjúkdómur og það er ekkert úrræði,“ segir Ásrún. 

Hún bendir á að eftir smáhýsi voru byggð við Héðinsgötu hafi atvikum snarfækkað þar sem fólk reyndi að fara inn í hús annarra. Úrræðið hafi þannig verið jákvætt fyrir íbúa smáhýsanna og nágranna þeirra.

Hún telur að málaflokkur vímuefnanotenda og heimilislausra þurfa meira vægi í umræðunni.

„Það er ömurlegt að það sé verið að fara inn í bílana en vandamálið er stærra, þetta er stærri mynd,“ sagði hún.