„Þetta er fal­legasti klúbbur í heimi“

Liverpool þurfti í það minnsta jafntefli gegn Tottenham á Anfield í dag til að tryggja sér titilinn. Liðið gerði miklu meira en það.

Eftir að hafa lent 0-1 undir snemma leiks setti Liverpool í fluggírinn og tryggði sér Englandsmeistaratitilinn með 5-1 sigri á heimavelli gegn lánlausu liði Tottenham.

„Þetta er fallegasti klúbbur í heimi,“ sagði sigurreifur Van Dijk í viðtali í leikslok. 

„Við eigum þetta skilið. Við ætlum að njóta þessa næstu vikurnar og drekka þetta allt í okkur.“

Þetta er í annað skipti sem Liverpool vinnur ensku úrvalsdeildina, en liðið fagnaði titlinum einnig árið 2020. Þá reið kórónufaraldurinn yfir heimsbyggðina og engir áhorfendur voru leyfðir á vellinum.

„Ég vildi vinna þetta fyrir stuðningsmennina á vellinum og um allan heim. Fyrir okkur öll.“

Þrátt fyrir að Liverpool hafi aðeins unnið ensku úrvalsdeildina í tvígang hefur liðið orðið enskur meistari tuttugu sinnum í heildina. Einhverjir hafa þó gert lítið úr því að þetta sé aðeins annar Englandsmeistaratitill liðsins á 35 árum.

„Við erum búnir að vinna ensku úrvalsdeildina tvisvar á fimm árum,“ sagði stuttorður Van Dijk hins vegar að lokum.