Þurfti á­falla­hjálp þegar flugi til Ís­lands var hætt

Í fréttum Stöðvar 2 var rifjuð upp sú ákvörðun Flugleiða árið 1998 að hætta beinu flugi til Lúxemborgar. Þetta er ákvörðun sem reyndist íslenska samfélaginu þar talsvert áfall en fjallað er um flugnýlenduna í þættinum Flugþjóðin.

„Það var það erfiðasta,“ segir Helga Adolfsdóttir, sem á þeim tíma var formaður Íslendingafélagsins í Lúxemborg.

„Ég held að ég hafi bara þurft áfallahjálp,“ segir María Karlsdóttir Huesmann, fyrrverandi flugfreyja hjá Loftleiðum, en hún flutti til Lúxemborgar árið 1967.

„Það breytti ansi miklu. Áður gat maður farið niður á ramp og inn í flugvélarnar og náð sér í Moggann og svona. En það var ekkert svoleiðis eftir það og ekki svona að hoppa upp í vél hér og fljúga til Íslands,“ segir Sigurður Lárusson, fyrrverandi deildarstjóri tækjadeildar Cargolux.

„Það náttúrlega birtist þannig að Ísland varð allt í einu svo langt í burtu. Þú ert í tólf klukkutíma, að minnsta kosti, að fara núna til Íslands,“ segir María.

„Það dálítið slitnaði líka í sambandi við aldraða foreldra og fleira, fólk hætti að treysta sér,“ segir Þorbjörg Jónsdóttir.

Hvernig íslenska samfélagið í Lúxemborg er í dag og hvort enn sé kraftur í Íslendingafélaginu má heyra um hér í frétt Stöðvar 2:

Seinni þáttur af tveimur um íslensku flugnýlenduna í Lúxemborg var sýndur á Stöð 2 í kvöld. Fyrri þátturinn um Lúxemborgarnýlenduna var sýndur síðastliðið þriðjudagskvöld. 

Hér má sjá tíu mínútna kafla úr fyrri þættinum um upphaf Cargolux:

Áskrifendur Stöðvar 2 og Stöðvar 2+ geta séð þættina um Flugþjóðina í streymisveitu Stöðvar 2 hvar og hvenær sem er.

Hér er kynningarstikla þáttanna: