Bein út­sending: Deildar­myrkvi á sólu

Sævar Helgi Bragason stjörnufræðingur fjallar um myrkvann á vef Iceland at Night. Þar segir að deildarmyrkvinn verði umtalsverður. 

Samkvæmt veðurspám dagsins verður myrkvinn vel sjáanlegur á Vesturlandi en um það leyti sem deildarmyrkvinn á að ganga yfir er spáð bjartviðri á vestan- og suðvestanverðu landinu. 

Hér á landi sést mestur myrkvi frá Vesturbyggð á sunnanverðum Vestfjörðum, þaðan sem tunglið hylur 75,3% sólar. Deildarmyrkvinn verður mestur yfir Quebec í Kanada, þar sem 93 prósent skífu sólar er hulin, segir í umfjöllun Sævars.

Stjörnuathugunarstöðin í Greenwich stendur fyrir beinni útsendingu á myrkvanum sem hægt er að nálgast hér að neðan. 

Smávægilegur munur er á þeim tímasetningum sem deildarmyrkvinn nær hámarki hér á landi, til að mynda nær hann hámarki klukkan 11:05 í Reykjavík en klukkan 11:11 á Egilsstöðum. Nánari upplýsingar um tímasetningar má nálgast á vef Iceland at Night.