Síðast hafði Ís­land aldrei keppt í Euro­vision og Pa­vel var ekki fæddur

Fjörutíu ár eru síðan að úrslitakeppnin fór síðast fram án þess að Keflavík væri með. Vera liðsins í úrslitakeppninni er því sú lengsta samfellda en gæti tekið enda núna.

Í Körfuboltakvöldi á Stöð 2 Sport í gærkvöld var farið yfir nokkrar staðreyndir um hvað var í gangi síðast þegar Keflavík komst ekki í úrslitakeppni. Ísland hafði þá til að mynda aldrei tekið þátt í Eurovision, Vigdís Finnbogadóttir var forseti, Pavel Ermolinskij og Kristrún Frostadóttir voru ekki fædd og fyrsti íslenski geisladiskurinn, sem nú er orðinn úreltur, hafði ekki verið framleiddur.

Keflavík á eftir leiki við Stjörnuna og Þór Þorlákshöfn:

„Þeir verða að vinna báða og vona að einhver úrslit falli með þeim. Mann langar rosalega mikið að hafa einhverja trú, ég veit að Siggi og Jonni [þjálfarar Keflavíkur] hafa reynt að þrengja „róteringuna“ og láta ákveðna aðila fá meiri ábyrgð, spila 33-38 mínútur, en maður sér þetta ekki gerast,“ sagði Sævar Sævarsson í Körfuboltakvöldi í gærkvöld en klippuna má sjá hér að neðan.

Teitur Örlygsson reyndi að hughreysta Keflvíkinga: „Þetta gerðist hjá Njarðvík fyrir þremur árum, svo að Keflavík þarf ekkert að örvænta. Það eru einhverjar leiðir til baka.“

„Munurinn á Keflavík og Njarðvík er að yngri flokka starfið má muna sinn fífil fegurri. Það eru einhverjir strákar að koma upp en það eru 2-3 ár í einhverja af þeim, og 4-5 ár í þá sem hafa mestu gæðin,“ sagði Sævar.