Orðinn mjög þreyttur á flakkinu

Guðlaugur samdi við Plymouth Argyle síðasta sumar og býr við sjávarsíðuna í því sem hann kallar sjálfur „Mónakó Englands“.

„Þetta er mjög fallegur staður þegar himininn er blár og sólin skín. Ég kalla þetta Mónakó Englands. Þetta er rosa fínt og fallegur hluti Englands. Lífið er mjög fínt hérna,“ segir Guðlaugur Victor í samtali við íþróttadeild.

Hann er því fluttur til Englands í annað sinn, eftir að hafa verið á mála hjá Liverpool sem ungur maður frá 2009 til 2012. Síðan þá hefur Guðlaugur spilað í níu löndum, að Englandi meðtöldu. Hann er kominn með gott af flakki í bili og vonast til að vera til loka samnings síns í Plymouth, sem nær til sumarsins 2026.

„Ég er orðinn mjög þreyttur á því. Ég get alveg viðurkennt það. Ég segi alltaf: Hér ætla ég að vera í þrjú ár og ætla að vera allan samningstímann. Svo gerist lífið og kemur eitthvað upp. Enda er ég núna að verða gamall í þessum fótboltaheimi og endirinn er nær manni. Svo ég kannski hætti að flytja í nánustu framtíð,“ segir Guðlaugur Victor.

En er hann þá farinn að huga að flutningum heim eða eitthvað slíkt?

„Nei, svo sem ekki. Líkaminn er góður, mér líður vel. Auðvitað eru hugsanir manns öðruvísi núna en þær voru fyrir nokkrum árum af því að maður er að verða 34 ára. En ég á 18 mánuði eftir af samningnum hér. Hver veit hvort ég verði hér út samninginn en eins og ég segi held ég að þetta sé bara einn dagur í einu og sjá hvernig hlutirnir þróast,“ segir Guðlaugur Victor.

Guðlaugur var tekinn tali á dögunum en um hálftíma langt viðtalið má heyra í spilaranum.