Róbert Frosti seldur til GAIS: „Kem síðan til baka að láta hinn rætast“

Róbert Frosti er aðeins nítján ára gamall en hefur þegar spilað 55 leiki í Bestu deildinni og skorað í þeim þrjú mörk.

Nú heldur þessi kraftmikli og sókndjarfi leikmaður til Svíþjóðar og í lið GAIS sem endaði í 6. sæti sænsku úrvalsdeildarinnar á síðustu leiktíð. Samningur Róberts Frosta gildir til næstu fimm ára.

„Ég vil nota tækifærið og þakka eftirtöldum aðilum: Jökli, Ejub og Ragga Trausta fyrir að hafa gert mig að betri leikmanni, frábærum liðsfélögum og síðast en ekki síst Hauki Þorsteins og Silfurskeiðinni,“ segir Róbert Frosti í tilkynningu frá Stjörnunni.

„Það hefur verið heiður að spila fyrir ykkur. þið eruð hjartað í þessu félagi.

Það er alveg jafn stór draumur hjá mér að verða Íslandsmeistari með Stjörnunni og að spila fótbolta erlendis. Nú ætla ég að eltast við annan af þessum draumum. Ég kem síðan til baka að láta hinn rætast,“ segir Róbert Frosti.