Snorri Steinn getur bætt met Gumma Gumm í kvöld

Það eru liðin fjórtán ár síðan Ísland vann fimm leiki í röð á HM í fyrsta og eina skiptið. Því náði íslenska liðið með því að vinna fimm fyrstu leiki sína á heimsmeistaramótinu í Svíþjóð 2011.

Leikurinn í kvöld er á móti Degi Sigurðssyni og lærisveinum í Króatíu sem eru á heimavelli. Það verður því mjög erfitt fyrir íslenska liðið að halda áfram sigurgöngu sinni.

Það eru reyndar fleiri met í boði fyrir Snorra Stein Guðjónsson og strákana í Zagreb í kvöld.

Snorri Steinn hefur nefnilega stýrt íslenska liðinu til sigurs á sex leikjum í röð á stórmóti því íslensku strákarnir unnu einnig tvo síðustu leiki sína á EM í fyrra.

Ísland endaði EM með því að vinna Króatíu og Austurríki en það dugði þó ekki liðinu til að komast upp úr milliriðlinum.

Sex sigurleikir í röð á stórmótum er metjöfnun. Guðmundur Guðmundsson náði að stýra íslenska liðinu til sigurs í sex leikjum í röð frá 2010 til 2012. Sá fyrsti var bronsleikurinn á móti Póllandi á EM í Austurríki 2010 og hinir fimm voru á heimsmeistaramótinu í Svíþjóð árið eftir.

Guðmundur er hingað til eini þjálfarinn sem hefur stýrt íslenska landsliðinu til sigurs á fimm leikjum í röð á einu stórmóti en því náði hann tvisvar. Fyrst á HM í Svíþjóð 2011 og svo aftur á Ólympíuleikunum í London 2012.

Hér fyrir neðan má sjá lista yfir flesta sigurleiki íslenska landsliðsins í röð á stórmóti.