Sjálf­stæðis­flokkurinn þurfi ferskt upp­haf

„Okkur sem sitjum í þingflokknum eða komum til greina með að sitja í næstu forystu heldur verður ekki síst að snúast um hvert flokkurinn ætlar að fara. Hvernig hann ætlar að byggja upp ferskt og nýtt upphaf, hvernig hann ætlar að leita í rætur sínar um stefnuna, líta inn á við og gera einfaldlega áætlun um að ná meiri árangri. Ég held að sú umræða sem mér finnst mest spennandi og hef talað fyrir lengi, allt frá því að ég var ritari Sjálfstæðisflokksins fyrir um áratug,“ segir Áslaug Arna Sigurbjörnsdóttir á Sprengisandi í morgun.

Áslaug segist hafa verið í samtali við flokksmenn undanfarna daga um hvaða verkefni séu fram undan. 

„Það er bæði að líta inn á við, við þurfum að horfa aðeins í grunninn okkar, hvernig við getum hluti betur, við þurfum að þora. Öflugir stjórnmálaflokkar þurfa að líta inn í framtíðina og nútímann, hvernig þeir skipuleggja sig og ná árangri. Ekki síst þurfum við að vera öflugri málsvarar stefnunnar okkar,“ segir hún.

„Grunnstefnan nær til miklu fleiri en við erum að ná til í dag. Það eru of margir sem eru ekki að fylgja okkur að máli í dag en aðhyllast samt grunnstefnu Sjálfstæðisflokksins. Það er verkefni líka. Okkur er legið á hálsi að tala bara fyrir ákveðna þjóðfélagshópa. Skilja ekki þarfir annarra hópa og svo framvegis en það er líka vilji vinstrimanna að skilgreina okkur með þessum hætti.“

Stefnu Sjálfstæðisflokksins ógnað af nýrri ríkisstjórn

„Ég held að þessi grundvallarsjónarmið Sjálfstæðisstefnunnar sem var byggt á frá upphafi um bæði sjálfstæði og svo umbætur á grundvelli einstaklings og atvinnufrelsi sé talsvert ógnað af núverandi ríkisstjórn. Við þurfum að veita harða andstæðu svo að svo sé ekki,“ segir Áslaug Arna.

Þá minntist Áslaug einnig á nýjan utanríkisráðherra.

„Þá er ég hrædd um þessar skattahækkanir sem ríkisstjórnin boðar, ekki síst að hún virðist ætla ganga hratt og örugglega inn í Evrópusambandið og er mætt í Brussel bara nokkrum dögum eftir að blekið á stjórnarsáttmálanum var þornað,“ segir Áslaug Arna.

„Hún er þarna mætt á fund með stækkunarstjórunum og það var kannski ekki mikið talað í kosningabaráttunni um þetta plan,“ segir hún. „Það er óheiðarlegt að ætla að ganga inn í Evrópusambandið strax að loknum kosningum og greina ekki kjósendum frá því í kosningabaráttunni. Þetta virðist hafa verið eina planið sem var tilbúið frá þeim en ef að leiðin til baka úr því sem gæti gert á næstu misserum getur verið löng en við þurfum að byrja núna og Sjálfstæðisflokkurinn hefur engan tíma að missa.“

Brennur fyrir stefnunni

„Ég brenn einfaldlega og hef ástríðu fyrir Sjálfstæðisstefnunni og tel ef hún fái þá náum við meiri árangri. Algjörlega burtséð niðurstöðum um forystukjör þá langar mig að taka þátt í þessu.“

Þú ert sem sagt að velta fyrir þér einhvers konar framboði?

„Já ég er að gera það,“ segir Áslaug. „Ég hef fengið mikla hvatningu til að gefa kost á mér í formannskjörið og er að hugsa um það.“

„Ég hef átt alveg ótrúlega góð samtöl við aðra þingmenn sem nefndir hafa verið í því. Það hefur verið mjög góð og mikilvæg samtöl, bara trúnaðarsamtöl með hagsmuni flokksins að leiðarljósi. Hvernig við getum gert þetta, hvað þarf að gera og hvar flokkurinn stendur. Við erum að mælast með sögulega lágt fylgi á sama tíma og erindið hefur í raun aldrei verið brýnna. Flokkurinn þarf einfaldlega festu og nýtt upphaf, sama hvað tekur við. Ég held að það skipti ekki síst máli að við getum valið forystu og gengið samhent út af landsfundi, klári þau stóru verkefni sem bíða okkar á bak við nýja forystu.“

Hér er einungis stiklað á stóru en viðtalið í heild sinni má hlusta á í spilaranum hér fyrir neðan.