„Hann kom víða við og snerti marga“

Egill lést 20. desember síðastliðinn á Landspítalanum við Hringbraut, 34 ára að aldri. 

Jónína Sigurðardóttir er ein af nánustu vinkonum Egils, og guðmóðir þriggja ára dóttur hans. Hún segir sjóðinn hugsaðan til stuðnings við fjölskylduna, en Egill lætur eftir sig eiginkonu sína, Ingu Maríu Hlíðar Thorsteinsson og tvö börn. Það eru þau Aron Trausti, fimm ára, og Sigurdís, þriggja ára. 

„Egill fellur frá og er með með tvö ung börn sem við viljum gera það sem við getum til að styðja við Inga María mun náttúrulega standa eftir ein. Við vitum að eftir svona stórfelld áföll er margt sem fylgir sem er mjög kostnaðarsamt,“ segir Jónína.

Viðtökur við stofnun sjóðsins hafi verið góðar, og fjöldi fólks deilt upplýsingum um sjóðinn áfram og lagt honum lið.

„Sem manni þykir bara ofboðslega vænt um.“

Upplýsingar um sjóðinn má finna neðst í þessari frétt.

Náinn vinskapur spratt upp úr háskólapólitíkinni

„Við kynntumst í nóvember 2015. Þá var hann formaður Vöku og ég formaður nemendafélags á menntavísindasviði. Hann boðaði mig á fund og bauð mér að taka þátt í starfinu,“ segir Jónína. 

Egill greindist með eitilfrumukrabbamein árið 2021 og var opinskár um baráttu sína við meinið.

Fljótlega eftir að þau kynntust segir Jónína að mikill vinskapur hafi tekist með þeim.

„Við vissum ekki þá að við yrðum svona góðir vinir. Ég er guðmóðir Sigurdísar, dóttur þeirra hjóna, og hef mikið verið með þeim á heimilinu. Egill var alltaf stuðningsmaður númer eitt fyrir mann, og fyrir börnin manns, og börn allra í kringum hann. Honum var annt um allt og alla,“ segir Jónína. 

Erfiðast að vera í burtu frá börnunum 

Jónina segir að Egill hafi fyrst og síðast verið fjölskyldumaður.

„Hann talaði alltaf mikið um börnin sín. Ég veit að það hefur verið það sem var sárast fyrir hann í þessu öllu saman, að geta ekki verið meira með þeim. hann lá inni á spítala síðustu sex mánuðina. Það var ofboðslega erfitt fyrir hann að vera svona löngum stundum í burtu frá börnunum sínum. Í gegnum þessu veikindi í tæp fjögur ár komu langir tímar þar sem hann var í einangrun eða þurfti að takmarka samskipti,“ segir Jónína. 

Jónína segir að Egill hafi almennt verið glaður í bragði og tekist á við hlutina með bros á vör. 

„En maður sá að þetta tók virkilega á hann.“

Kom víða við og hreyfði við samferðafólki

Egill var borgarfulltrúi Sjálfstæðisflokksins frá árinu 2018 til 2022, og varaborgarfulltrúi síðastliðin tvö ár. Hans var minnst í upphafi borgarstjórnarfundar í Ráðhúsinu í dag. Þar fór Einar Þorsteinsson borgarstjóri yfir feril Egils, og vottaði fjölskyldu hans og aðstandendum samúð.

Oddviti Sjálfstæðismanna og samstarfskona Egils, Hildur Björnsdóttir, talaði einnig um Egil í upphafi fundarins.

„Hann var góður samstarfsmaður, traustur vinur og einstakur mannasættir,“ sagði Hildur meðal annars um Egil félaga sinn, áður en borgarfulltrúar risu úr sætum og minntust Egils með einnar mínútu þögn. 

Jónína segir Egil hafa komið víða við, og haft áhrif á fjölda samferðamanna sinna. 

„Hann var virkur í félagsstörfum á mörgum stöðum, nú síðast í stjórn Krafts, hann var virkur í Oddfellow, var mikið í Vöku og formaður nemendafélagsins í félagsfræðinni. Hann kom víða við og snerti marga,“ segir Jónína. 

Egill verður jarðsunginn frá Grafarvogskirkju á morgun, 8. janúar, klukkan 13.