Ekki séð stærri hval reka í Víkurfjöru

Jóhannes Marteinn Jóhannesson jarðfræðingur og verkefnastjóri hjá Katla Geopark býr í Vík. Hann segir hvalinn hafa byrjað skolast á land í gærmorgun og verið kominn lengra upp á land í dag. 

Hann segist ekki  geta sagt til um hvort um skíðishval eða tannhval er að ræða, þar sem hann sá ekki munninn á hræinu, sem er um fimm metrar á lengd. 

„Ég hef ekki séð svona stóran hval áður í Víkurfjöru, en það eru nokkur ár síðan það var stór hvalur í Reynisfjöru síðast,“ segir Jóhannes í samtali við fréttastofu. Reglulega reki smáhvali þó í Víkurfjöru.

Hann bendir á að samhliða hvalnum hafi stærðarinnar hryggjarstykki rekið í fjöruna. „Hryggjalið rak einnig á land á sama tíma, stór, en er ekki úr sama dýri.“

Jóhannes kveðst búinn að láta hreppinn og Hafrannsóknarstofnun vita af hræinu.