Teitur hefði grætt næstum því eina milljón á Lengjunni

Teitur fylgdist með leikjunum fjórum í Skiptiborðinu ásamt Herði Unnsteinssyni og Ómari Sævarssyni.

Fyrir leik þá fékk Hörður sérfræðinga sína til að spá fyrir sigurvegarana í leikjunum.

Teitur spáði Haukum fyrsta sigri sínum í vetur og það á móti Íslandsmeisturum Vals á þeirra eigin heimavelli.

Hann spáði einnig sigri hjá Njarðvík á móti Grindavík, að ÍR myndi vinna KR í Vesturbænum og að Þór myndi vinna Hött í Þorlákshöfninni.

Allt þetta gekk eftir og eftir að úrslitin voru ljós þá var Teitur áhugasamur að fá vita stuðlana á Lengjunni.

„Ég á eftir að kaupa jólagjafir,“ sagði Teitur léttur þegar hann spáði og talaði síðan um jólagjöf fyrir konuna eftir að úrslitin voru ljós.

Hefði hann sett tíu þúsund krónur á þessi fjögur úrslit þá hefði hann unnið 986 þúsund krónur á Lengjunni.