Virðist úti­loka sam­starf með Sam­fylkingu

Þetta segir Bjarni í færslu á Facebook, þar sem hann ávarpar Sjálfstæðismenn og kæra vini í kjölfar alþingiskosninga á laugardag.

„Það eru langir dagar að baki. Við hófum baráttuna í mótvindi fyrir fáeinum vikum. Við látum slíkt ekki á okkur fá og lögðum enn meira á okkur fyrir vikið. Niðurstaðan varð enda allt önnur en sérfræðingarnir höfðu spáð.“

Eftirspurn eftir vinstristjórn ekki fyrir hendi

Bjarni segir að stærstu fréttirnar eftir kosningarnar séu að eftirspurn eftir vinstri stjórn hafi ekki reynst fyrir hendi. Tveir vinstri flokkar hafi fallið af þingi og Samfylkingin hafi tapað fylgi alla baráttuna.

Þar vísar Bjarni til Pírata og Vinstri grænna sem töpuðu öllum sínum þingmönnum og þess að Samfylkingin mældist hæst með um þrjátíu prósenta fylgi á síðasta kjörtímabili.

„Uppskeran voru ekki þau tíðindi sem margir vilja halda fram fyrir þann flokk, sem haft hefur ellefu ár til að byggja sig upp í stjórnarandstöðu. Allan þann tíma hefur Sjálfstæðisflokkurinn tekið ábyrgð á landsstjórninni.“

Eigi ekki að sætta sig við minna en tuttugu prósent

Sjálfstæðisflokkurinn hafi lagt upp í kosningabaráttuna með skýra stefnu og glæsilega frambjóðendur. „Töluðum fyrir lægri álögum og léttari byrðum allra kynslóða, öflugu atvinnulífi um land allt, grænni orkuöflun, minna ríki, raunverulegum umbótum í menntakerfinu og nýtingu nýrrar tækni til að gera meira fyrir minna í opinberri þjónustu.“

Þrátt fyrir að staða Sjálfstæðisflokksins væri önnur en Framsóknarflokks og Vinstri grænna ættu Sjálfstæðismenn ekki að sætta sig við fylgi rétt undir tuttugu prósentum. Markmiðið nú sé skýrt, það sé að afla flokknum meiri stuðnings. Þetta verði ekki gert með því að falla frá stefnumálum flokksins eða hlaupa undir bagga með þeim sem kynnt hafa plan um tugmilljarða útgjaldaaukningu og hærri skatta.

„Valkostirnir nú eru þessir: Annars vegar að mynda borgaralega ríkisstjórn til hægri, líkt og niðurstöður kosninganna eru skýrt ákall um. Hins vegar að veita nýrri ríkisstjórn kröftuga mótspyrnu í stjórnarandstöðu.“

Ekki er óvarlegt að túlka orð Bjarna sem svo að hann hafi ekki áhuga á að stofna til ríkisstjórnarsamstarf með Samfylkingu. Kristrún Frostadóttir, formaður hennar, fékk í morgun umboð forseta Íslands til að mynda ríkisstjórn.

Stoltur af árangrinum hvernig sem fer

Loks segir Bjarni að Sjálfstæðismenn hafi beðið um breytingar með því að slíta stjórnarsamstarfinu í október, enda hafi hann ekki séð fram á að frekari árangur myndi nást í því mynstri. Það hafi verið rétt ákvörðun. 

„Þá höfðum við lagt grunninn og gátum gengið til kosninga með góðri samvisku. Fjárlög voru komin fram og kláruðust, verðbólga er í frjálsu falli, vextir teknir að lækka og munu að óbreyttu lækka hratt á nýju ári. Til þess þarf ekki annað en að framfylgja áfram okkar stefnu með ábyrgri hagstjórn og aðhaldi í ríkisrekstri.“

Hvernig sem úr spilist sé hann stoltur af árangri Sjálfstæðisflokksins, oftar en ekki í skugga stórra áfalla.

„Heimsfaraldur, innrásarstríð í Úkraínu með fjölgun hælisleitenda um alla Evrópu að ógleymdum hamförunum í Grindavík. Þrátt fyrir áskoranir höfum við staðið sterk og horfum fram á mikil tækifæri til lífskjarasóknar fyrir landsmenn allra. Næstu dagar fara í að leggja línurnar í samstarfi við þingflokkinn og annað nánasta samstarfsfólk. Ég hlakka til að hitta ykkur aftur fyrr en síðar. Njótið aðventunnar.“