„Vona að þessi leikur verði epískur“

Víkingur og Breiðablik eru jöfn að stigum á toppi Bestu deildarinnar en Víkingar eru með hagstæðari markatölu og dugir því jafntefli í kvöld til að verða meistarar í þriðja sinn undir stjórn Arnars.

„Tilfinningin er ótrúlega góð og sterk. Auðvitað ertu búinn að hugsa um leikinn daglega í aðdraganda Evrópuleiksins en leyfðir þér ekki að fara alla leið fyrr en núna. Þá kemur allt í einu fiðringur og spenna og maður skynjar líka eftirvæntinguna hjá knattspyrnuáhugafólki og jafnvel fleirum, því það er mikið búið að ganga á síðustu ár í leikjum þessara liða. Mögulega verður hápunktinum í öllu þessu ferðalagi náð á sunnudaginn [í dag],“ sagði Arnar í samtali við Val Pál Eiríksson eftir blaðamannafund í Víkingsheimilinu á föstudaginn.

Mun aldrei nota þreytu sem afsökun

Víkingur spilaði við Cercle Brugge í Sambandsdeild Evrópu á fimmtudaginn og vann frækinn sigur, 3-1. Breiðablik spilaði hins vegar síðast á laugardaginn. Arnar segir að hann muni aldrei bregða fyrir sig afsökun um álag.

„Ef þú spyrð einhvern prófessor í þjálfunarfræði myndi hann klárlega segja já. En ég ætla að leyfa mér að vona að svarið sé nei, einmitt út af umfangi leiksins, stærðargráðu og adrenalíninu sem þessu fylgir,“ sagði Arnar aðspurður hvort Evrópuleikurinn myndi hafa einhver áhrif í kvöld.

„Ég ætla aldrei að tala um þreytu sem afsökun ef illa fer á sunnudaginn. Það verður enginn þreyttur á sunnudaginn. Ég lofa þér því.“

Getur sogað í þig stemmninguna

Arnar verður ekki á hliðarlínunni í kvöld þar sem hann tekur út leikbann. Hann mun því sitja uppi í stúkunni á meðan Sölvi Geir Ottesen stýrir Víkingsliðinu.

„Það tók mig eiginlega langan tíma að sætta mig við þetta. Þú vilt vera með þínum leikmönnum og þínu fólki. Ég verð svo stressaður á sunnudaginn. Þú getur ekki sagt neitt eða gert neitt, hlaupið neitt eða öskrað neitt á aðstoðardómarann, eða eitthvað. Þetta verður súrrealískt,“ sagði Arnar.

„Að sama skapi sem stuðningsmaður leiksins geturðu alveg sogað í þig stemmninguna sem fylgir því að vera uppi í stúku. En þetta verður erfitt, að vera ekki inni í klefa fyrir leikinn. Þú hugsar: Fór ég ekki örugglega yfir allt og þess háttar. Þetta verður hræðileg stund en jafnframt örugglega áhugaverð og skemmtileg.“

„Showbiz“ leikur

Hann vonast eftir því að úrslitaleikurinn verði opinn og skemmtilegur og stressið verði ekki yfirþyrmandi, á kostnað skemmtanagildisins.

„Ég hef horft á marga úrslitaleiki í gegnum tíðina og hef alltaf verið svekktur þegar leikirnir verða leiðinlegir af því mér finnst eins og þetta sé „showbiz“ leikur, ekki bara fyrir leikmenn og stuðningsmenn viðkomandi liða heldur einnig fyrir knattspyrnuáhugamenn úti um allt land,“ sagði Arnar.

„Ég vil leyfa mér að vona að þessi leikur verði epískur þar sem bæði lið sækja til sigurs. Mér finnst fótboltinn eiga það skilið á þessum tíma. Ef það gerist verða bæði lið sigurvegarar. Það er alltaf verið að hampa liðum sem vinna titil og þess háttar en menn gleyma svolítið þeim sem hafa eitthvað til málanna að leggja. Ég ætla að vona að þetta verði algjör „showbiz“ leikur þar sem bæði lið leggi allt í þetta og þetta endi 3-3.“

En hvað mun ráða úrslitum í kvöld?

„Einhver atvik. Bæði lið hafa klassa leikmenn í sínum herbúðum. Það verða einhver einstaklingsatvik, jafnvel dómaramistök sem er viðunandi á þessu stigi þegar þú ert ekki með VAR. Það verða einhver epísk atvik sem verða til þess að annað liðið hampi bikarnum og hitt ekki sem gerir það að verkum að betra liðið vinnur í þeim leik. En það er bara sama mantran: Besta liðið verður Íslandsmeistari og besta liðið hefur tækni, getu, þor, hugrekki og smá dass af heppni til að vinna titil,“ svaraði Arnar.

Horfa má á viðtalið við Arnar í spilaranum hér fyrir ofan.

Leikur Víkings og Breiðabliks fer fram á Víkingsvelli klukkan 18:30 í dag og verður sýndur beint á Stöð 2 Sport. Upphitun fyrir leikinn hefst klukkan 17:45. Eftir leikinn verður Besta deild karla svo gerð upp í lokaþætti Stúkunnar.