Vara­þing­maður hættur í flokknum og úthúðar Ást­hildi Lóu

Í pistli í Eyjafréttum segir hann sérstakt að vera ekki í kosningaslag núna eftir rúmlega 3 ár í Flokki fólksins.

„Ástæða fyrir brotthvarfi mínu úr flokknum má rekja til nokkurra atburða sem áttu sér stað bæði fyrir síðustu kosningar sem og á kjörtímabilinu, en byrjum á síðustu kosningum.“

Hefði ekki tíma til að sinna kjördæminu

Í pistli sínum rekur Georg Eiður samskipti sín við Ásthildi Lóu Þórsdóttur, þingmann flokksins í Suðurkjördæmi, sem hann bendir á að eigi reyndar heima í Garðabæ.

„Efir kosningarnar, þar sem Ásta Lóa var orðin þingmaður okkar sunnlendinga en er íbúi í Garðabæ, þá fór ég að senda reglulega á hana í skilaboðum alltaf þegar eitthvað var að gerast í kjördæminu, sem mér fannst að hún ætti að vita og þá hugsanlega koma á framfæri athugasemdum á þinginu, en eftir nokkra mánuði, þá hafði hún samband við mig og bannaði mér að senda svona efni á sig vegna þess, að hún hefði einfaldlega ekki tíma til að sinna einhverju öðru en því, sem hún var að sinna á Alþingi. Þetta pirraði mig alveg rosalega mikið, en já, ég leysti af í viku vorið 2022 og fékk mikið lof frá mínu fólki fyrir það sem ég talaði um þar. Í framhaldinu bjóst ég að sjálfsögðu við að frá frekari afleysingar veturinn þar á eftir, en aldrei kom símtalið.“

Hefði ekki efni á að kalla inn varaþingmann þrátt fyrir þrjár utanlandsferðir á ári

Georg Eiður segir að fljótlega eftir áramót árið 2023 hafi vinur hans haft samband við hann og spurt hvers vegna hann væri ekki á þingi, í ljósi þess að Ásthildur Lóa væri í útlöndum.

Hann hafi þá haft samband við Ásthildi Lóu og spurt hverju sætti að hann hefði ekki verið kallaður á þing. Hann hafi fengið loðin svör um að ferðalagið hafi verið óvænt og tími ekki gefist til að kalla inn varaþingmann.

„En veturinn leið sem sagt án þess að ég fengi kallið og það var ekki fyrr en í lok júní sumarið 2023 sem Ásta Lóa kom og hitti mig niðri á bryggju, ekki til að heilsa uppá, heldur til að tilkynna mér það að loforðið sem hún gaf um afleysingar, væri loforð sem hún gæti ekki staðið við, vegna þess að hún hefði ekki efni á því. Mér fannst þetta mjög sérstakt í ljósi þess að hún fór a.m.k. 3 ferðir erlendis þetta árið.“

Þingmenn sjá um eigin lista

Georg Eiður segir að hann hafi heyrt í Ingu Sæland, formanni Flokks fólksins, á dögunum þegar ríkisstjórnin sprakk og boðað var til kosninga. Hún hafi tjáð honum að þingmenn í hverju kjördæmi myndu sjá um sína lista. 

„Ég gerði mér alveg grein fyrir því að ég væri ekki að fara að fá annað sætið hjá Ástu Lóu og þegar hún hafði samband við mig um miðja síðustu viku, hafði ég undirbúið mig aðeins fyrir það símtal, m.a. með því að ræða við stuðningsmenn. Sumir sögðu að ég ætti að hætta strax, en aðrir að ég ætti að hætta ef hún byði mér neðar en annað sætið. Ég vildi hins vegar fá svör frá þingkonunni um þessi atriði sem ég hef nú þegar skrifað í þessari grein. Svörin komu mér ekki á óvart.“

Svör Ásthildar Lóu hafi verið á þá leið að hún myndi hvorki eftir því að hafa sagst ekki hafa tíma fyrir málefni Suðurkjördæmis né að hafa lofað Georgi Eiði fleiri innköllunum á þing. Svo hafi hún boðið honum fjórða sætið á lista.

„Ég hafnaði því strax og í raun og veru, miðað við hvernig samtalið þróaðist, þá hefði ég heldur ekki tekið 2. sætið, enda kemur ekki til greina að fara í eitthvað framboð með manneskju sem maður treystir ekki og stendur ekki við það sem hún lofar. En í dag hef ég einnig sagt mig úr flokknum.“