Grunaði í máli Madelein­e Mc­Cann sýknaður af öðrum brotum

Brotin voru sögð hafa átt sér stað í Portúgal á árunum 2000 til 2017 en dómarinn í Braunschweig í norðurhluta Þýskalands hafði gefið til kynna í sumar að málalok yrðu þessu, þegar hann sagði ónóg sönnunargögn liggja fyrir.

Brückner mun áfram sitja í fangelsi, þar sem hann er dæmdur barnaníðingur og kynferðisbrotamaður og afplánar nú dóm fyrir að hafa nauðgað 72 ára konu frá Bandaríkjunum í Praia da Luz, þar sem McCann hvarf, árið 2005.

Hann verður að óbreyttu látinn laus í september á næsta ári.

McCann málið kom ítrekað við sögu í réttarhöldunum yfir Brückner og lögmaður hans sagði það hafa „legið eins og þoka“ yfir málunum sem raunverulega voru til umfjöllunar.

Yfirvöld í Þýskalandi hafa ítrekað sagst hafa óyggjandi sönnunargögn fyrir því að Brückner hafi átt þátt í ráninu á McCann en hafa ekki viljað greina nánar frá málavöxtum. Þá hefur lítið verið greint frá stöðu rannsóknar málsins.

McCann hvarf úr leiguíbúð fjölskyldu sinnar á Praia da Luz árið 2007. Hún var þá sofandi í íbúðinni ásamt yngri systkinum sínum en foreldrar hennar voru á veitingastað með vinum, í um 50 metra fjarlægð.

Madeleine var þriggja ára þegar hún hvarf.