Scholes brjálaður: De Ligt geti ekkert og ten Hag þjálfi liðið varla

Hollenski varnarmaðurinn Matthijs de Ligt var keyptur til United fyrir 43 milljónir punda í sumar en hefur ekki farið frábærlega af stað. Scholes segir hann engu bæta við United-liðið.

„Þegar þú kaupir leikmenn býstu við því að þeir séu töluvert betri en þeir sem þú ert með fyrir. Ég sé enga leikmenn sem bæta miklu við þetta lið,“ segir Scholes um kaup sumarsins en Joshua Zirkzee, Noussair Mazraoui og Manuel Ugarte voru einnig keyptir til Manchester.

De Ligt geri ekkert fyrir liðið, sem Harry Maguire, sem var hjá United fyrir, geti ekki gert.

„De Ligt hefur komið inn fyrir Maguire, en það er enginn munur þarna á,“ segir Scholes. Aðspurður um það hvort De Ligt væri þó betri en Maguire, segir Scholes: „Nei, alls ekki.“

United tapaði 3-0 fyrir Tottenham um helgina, sem var þriðji leikurinn í röð án sigurs. United á leik við Porto í Evrópudeildinni á fimmtudag og sækir liðið svo Aston Villa heim á sunnudaginn kemur.

„Þú veist ekkert hvernig þetta lið ætlar að spila,“ segir Scholes. „Þú hefur ekki hugmynd um hvernig menn nálgast leiki, hvort þeir ætli að sækja hratt, liggja neðarlega eða reyna að halda í boltann. Við höfum enga hugmynd. Þetta lítur út eins og óþjálfað fótboltalið,“ segir Scholes sem virðist kenna ten Hag um ófarirnar.

Mikil pressa hefur myndast í kringum hollenska þjálfarann en stjórn Manchester United er sögð standa við bak hans, enn sem komið er.