Handleggsbrotnum bjargað af Baulu

Um var að ræða tvo ferðamenn sem voru nokkuð hátt uppi, að sögn Jóns Þórs Víglundssonar, upplýsingafulltrúa Landsbjargar.

Voru ferðamennirnir nokkuð kaldir þegar komið var að. Annar þeirra hafði orðið fyrir slysi og reyndist handleggsbrotinn. Búið var um brotið á vettvangi en maðurinn síðan fluttur til aðhlynningar í Reykjavík þegar þyrlan komst að.

Uppfært kl. 7.30:

Eftirfarand tilkynning var að berast frá Landsbjörgu.

„Í gærkvöldi óskuðu tveir göngumenn sem höfðu gengið á Baulu eftir aðstoð eftir að annar þeirra hafði runnið í skriðu og fallið með þeim afleiðingum að handleggsbrotna.

Þeir voru þá enn staddir nokkuð hátt í fjallinu og gönguleiðin niður brött, laus í sér og skyggni að versna til muna.

Björgunarsveitir á Vesturlandi fóru til aðstoðar, sem og þyrla frá Landhelgisgæslunni. Skyggni á staðnum var ekki nægjanlegt til að þyrla gæti athafnað sig og var henni lent á þjóðveginum upp á Bröttubrekku.

Björgunarsveitarfólk hélt gangandi á fjallið til móts við göngumennina. Það var um klukkan 2 í nótt sem björgunarfólk kom að þeim. Þeir voru þá báðir orðnir nokkuð kaldir og hraktir og sá slasaði nokkuð kvalinn.

Björgunarfólk bjó um handleggsbrotið og gaf honum verkjastillandi. Björgunarfólk fylgdi svo göngumönnunum áfram niður og gekk sú ferð ágætlega.

Upp úr hálf fjögur í nótt fór að birta til og gat þá áhöfn þyrlu Landhelgisgæslu farið í loftið aftur og klukkan fjögur í nótt var hinn slasaði kominn í borð í þyrlu sem flutti hann til aðhlynningar á sjúkrahús í Reykjavík.

Hinn göngumaðurinn fór áfram niður í fylgd björgunarfólks þar sem fjölskyldumeðlimur tók á móti honum.“