Á­fall og tíma­bilinu lokið hjá Arnari: „Fæ engu breytt úr þessu“

„Það kemur bolti inn fyrir sem ég ætla að reyna hlaupa að og sópa upp. Þegar að ég er að spyrna mér af stað þá smellur eitt­hvað í hásininni,“ segir Arnar Freyr. „Eins og staðan er núna er ég bara með slitna hásin. Þarf að fara í að­gerð að láta laga það og svo er það að reyna koma sér aftur til baka í þetta.“

Arnar var viss um leið og atvikið á sér stað að hásinin væri slitin.

„Miðað við lýsingar sem maður hafði heyrt áður frá fólki sem hafði lent í því að slíta hásin, hvernig það væri, þá var ég eigin­lega alveg viss um að þetta væri hásinin sem væri farin.“

Þó svo að Arnar hefði verið viss frá fyrstu stundu að hásinin væri slitin var sóknar­maður Vestra ekki alveg með á nótunum og taldi hann vera með krampa og gerði til­raun til þess að teygja á fæti Arnars.

„Það var ein­hver smá mis­skilningur í gangi þarna en hann áttaði sig á að­stæðum áður en hann fór að teygja á mér. Að þetta væri ekki krampi. Við náðum að stoppa hann af áður en hann fór að teygja á kálfanum á mér.

Ljós að tíma­bilinu er lokið fyrir Arnar Frey sem er með reynslu­mestu leik­mönnum HK og mikill leið­togi. Fram­undan hátt upp í ár fjarri knatt­spyrnu­vellinum. Ljóst er að um mikið á­fall er að ræða fyrir Arnar en ekki síður HK-liðið sem háir harða botn­bar­áttu í Bestu deildinni um þessar mundir.

„Eins og staðan er akkúrat núna er ég furðu brattur. Ég veit svo sem ekki hvernig þetta verður þegar að maður hefur ekki mætt á fót­bolta­æfingu í ein­hvern tíma. Þetta er bara eitt­hvað sem maður verður að sætta sig við. Ég fæ engu breytt úr þessu . Við reynum bara að taka þetta á kassann og koma sterkari til baka.

Það lengsta sem maður hefur verið frá vegna meiðsla eru ein­hverjar fimm til átta vikur. Þetta er alveg glæ­nýtt fyrir mér. Svo verður bara að koma í ljós hvernig maður tæklar það þegar að líður á.

Það er erfitt að skilja við liðið á þessum stað þrátt fyrir að ég treysti þeim full­kom­lega fyrir því að klára þetta verk­efni. Maður reynir bara að vera til staðar fyrir þá utan vallar. Hjálpa til eins mikið og maður getur.“