Evrópu­meistarinn Bronze á leið til Chelsea

Bronze er talin með bestu leikmönnum heims um þessar mundir og hefur verið undanfarin ár. Hún spilaði með Barcelona frá 2022 til ársins í ár en hefur einnig spilað fyrir franska stórliðið Lyon ásamt Manchester City í heimalandinu.

Ásamt því að verða Evrópumeistari með Englandi og fara alla leið í úrslit á heimsmeistaramótinu síðasta sumar þá hefur Bronze fimm sinnum sigrað Meistaradeild Evrópu. 

Bronze yrði annar leikmaðurinn sem myndi ganga í raðir Chelsea frá Barcelona í sumar en hin tvítuga Júlia Bartel samdi við Chelsea fyrir ekki svo löngu síðan.

Það er ljóst að um mikinn feng yrði að ræða fyrir Chelsea sem er að undirbúa sig undir fyrsta tímabilið án þjálfarans Emmu Hayes í meira en áratug. Hin þýska Melanie Leupolz er farin til Real Madríd og þá má reikna með frekari breytingum.