„Það að sá sem fer með fjár­veitingar­valdið standi að þessu er sér­stak­lega á­mælis­vert“

Enn einn ágreiningurinn er risinn í ríkisstjórnarsamstarfinu. Dómsmálaráðherra skammaði í dag fjármálaráðherra fyrir meint afskipti af störfum lögreglunnar. Tilefnið er bréf fjármálaráðherra til lögreglunnar í gær þar sem hann bendir meðal annars á að netverslanir með áfengi kunni að fela í sér brot á lögum.

Dómsmálaráðherra sendi frá sér tilkynningu vegna málsins í dag þar sem hún segir grundvallaratriði að meðferð sakamála eigi ekki að lúta pólitískum afskiptum valdhafa enda séu slík afskipti af rannsóknum til þess fallin að grafa undan réttarríkinu.

Hið óeðlilegasta mál

Elías Blöndal Guðjónsson framkvæmdastjóri Sante, netverslunar með áfengi, segir bréf fjármálaráðherra koma spánskt fyrir sjónir.

„Þetta er auðvitað mjög óeðlilegt, að pólitískir valdhafar séu að reyna að hafa áhrif á sakamálarannsóknir. Það er auðvitað grundvallarregla í íslensku sakamálaréttarfari að pólitískir valdhafar eigi ekki að hafa áhrif á lögregluna.“

Ákæruvaldið sé sjálfstætt og þess vegna telur hann bréfið gróft brot á þrískiptingu ríkisvaldsins.

„Þess vegna kom það okkur mjög á óvart að lesa um þessar vendingar í blöðunum.“

Pólitík eigi ekki að ráða för við meðferð sakamála

Elías segir að vitaskuld sé fjármálaráðherra yfirmaður ÁTVR en hann hafi ekkert með málefni lögreglunnar að gera.

„En það breytir því ekki að fjármálaráðherra hefur ekkert með málefni lögreglunnar að gera, það er dómsmálaráðherra sem hefur umsjón með þeim málaflokki. Og ég ég held reyndar að meira að segja dómsmálaráðherra hafi vit á því að vera ekki að blanda sér í sakamálarannsóknir.“

Málið sé alvarlegt og hefur hann sent Umboðsmanni Alþingis kvörtun vegna þess.

„Ég veit eiginlega ekki í hvaða landi þetta á að geta viðgengist, að pólitík eigi að ráða för í meðferð sakamála.“

Elías rifjar upp nýleg dæmi þar sem afskipti ráðherra voru harðlega gagnrýnd af þingmönnum og öðrum.

„Ég held að ráðherrann gæti verið kominn í dálítil vandræði út af þessu.“

Valdhafar eigi ekki að nota lögreglu til að ná fram pólitískum markmiðum

Þá segir hann málið sérstaklega ámælisvert í ljósi þess að ráðherrann fer með fjárveitingarvald til lögreglunnar og því geti samskiptin litið út sem tilraun til að misnota fjárhagslegt vald sitt.

„Fjármálaráðherra fer með mjög ábyrgðarmikið hlutverk varðandi fjárveitingar hins opinbera og það er sérstaklega ámælisvert að fjármálaráðherra skuli vera með hálfgerð fyrirmæli til lögreglunnar um að rannsaka borgarana. Þetta grefur auðvitað undan trausti lögreglunnar og stjórnvalda. Það má þá segja að borgararnir geti haft grun um að pólitíkusar beiti fyrir sig lögreglu til að ná fram pólitískum markmiðum. Það að sá sem fer með fjárveitingarvaldið standi að þessu er sérstaklega ámælisvert.“

Geti reynst ráðherranum erfitt

Elías bendir á að það sé löggjafans að ákveða með hvaða hætti áfengissölu á Íslandi sé komið fyrir.

„Okkar netverslun er búin að færa íslenskum almenningi tuttugu prósenta kaupmáttaraukningu. Hér er hægt að fá bjór á tuttugu til fjörutíu prósent lægra verði og það má kannski segja að þessa kaupmáttaraukningu vilji Framsóknarflokkurinn eða að minnsta kosti fjármálaráðherra taka af fólki og ég held að það geti reynst honum mjög erfitt.“