Loðin yfir­lýsing UFC á elleftu stundu vekur furðu

Segja má að yfirlýsing komi á elleftu stundu fyrir UFC áhugafólk sem ætlaði að gera sér ferð á 3Arena leikvanginn í Dublin í dag til þess að verða vitni að blaðamannafundinum en eins og sagan hefur sýnt eru blaðamannafundir Conor McGregor jafnan skrautlegir og afar vel sóttir. 

UFC gefur lítið upp varðandi ástæðu frestunarinnar og hefur það bara vakið upp getgátur sem og stórar spurningar varðandi það hvort eitthvað verði af bardaga McGregor og Chandler yfir höfuð.

„Blaðamannafundinum fyrir UFC 303 bardagakvöldið, sem fara átti fram mánudaginn 3.júní í Dublin á Írlandi, hefur verið frestað. Við biðjum það stuðningsfólk, sem ætlaði að gera sér ferð á blaðamannafundinn, afsökunar. Þegar að frekari upplýsingar berast um nýja dags- og tímasetningu munum við láta ykkur vita um leið,“ segir yfirlýsingu UFC. 

Dana White, forseti UFC sambandsins, hefur ekkert tjáð sig eftir að yfirlýsing UFC var gefin út en hann var sjálfur á leiðinni til Dublin líkt og hann tjáði blaðamönnum eftir bardagakvöld UFC sambandsins um nýliðna helgi. Þá hefur ekkert heyrst úr herbúðum McGregor eða Chandler eftir að yfirlýsingin var gefin út.

UFC 303 bardagakvöldið fer fram á T-Mobile leikvanginum í Las Vegas. Þar er aðalbardagi kvöldsins bardagi Conor McGregor og Michael Chandler sem beðið er eftir með mikilli eftirvæntingu.

Bardaginn markar endurkomu McGregor í búrið en hann barðist síðast í júlí árið 2021 gegn Dustin Poirier. Sá bardagi fór ekki vel fyrir Írann sem fótbrotnaði. 

Yfirlýsing UFC í morgun hefur eins og fyrr segir vakið upp margar spurningar um ástæðu frestunarinnar og telja margir nokkuð víst að McGregor tengist að einhverju leyti þeirri frestun. 

Spyrja sig margir að því hversu áhugasamur McGregor er um endurkomu sína í búrið eftir að myndskeið og myndir af honum og eiginkonu hans á næturlífinu í Dublin í síðustu viku birtust á samfélagsmiðlum. 

Má þar sjá McGregor á Black Forge Inn, bar hans eigu, aðeins nokkrum vikum fyrir bardagann gegn Michael Chandler.  

Endurómar umræðan sem er uppi núna þá umræðu sem hefur verið uppi á borðinu undanfarin ár og snúa að því hvort viljinn og lönguninn hjá McGregor, í að halda bardagaferli sínum áfram, sé enn til staðar. 

Þá hafa hneykslis­mál utan búrsins tengd McGregor komið upp. Ó­spektir á al­manna­færi sem og á­sakanir um nauðgun og líkams­árasir.

McGregor hefur verið með hæst launuðu í­þrótta­mönnum heims undan­farin ár, hann hefur stofnað sinn eigin rekstur, lifir hátt og þyrfti í rauninni, peninganna vegna, ekki að halda á­fram að sínum UFC ferli.