Hefja út­hlutun lóða í Vatnsendahvarfi

Í tilkynningu á vef Kópavogs segir að í þessum fyrsta áfanga verði sex lóðum fyrir fjölbýlishús úthlutað. Í hverfinu er gert ráð fyrir 500 íbúðum í fjölbýli, par- og raðhúsum og einbýli. Stefnt sé að því að úthluta öllum lóðum á árinu en í nokkrum áföngum.

„Það er gríðarlega spennandi að fá nýtt hverfi í Kópavoginn og við finnum að það er mikill áhugi, enda góð staðsetning á frábærum útsýnisstað í nálægð við mikla náttúrufegurð. Áhersla er lögð á fallega og umhverfisvæna byggð í Vatnsendahvarfi með góðum samgöngutengingum fyrir alla ferðamáta. Þá munu íbúar njóta góðs af þeirri þjónustu sem fyrir er í nærumhverfinu auk þess sem reistur verður leikskóli og grunnskóli fyrir 1. til 4. bekk í þessu nýja hverfi.“ er haft eftir Ásdísi Kristjánsdóttur, bæjarstjóra Kópavogs.

Byggð í Vatnsendahvarfi muni falla vel að nærliggjandi svæðum og gróður og náttúra fléttist inn í opin svæði hverfisins. Áhersla verði lögð á góðar samgöngutengingar fyrir gangandi, hjólandi og akandi vegfarendur.

Hverfið standi á Vatnsendahæð og afmarkist af Álfkonuhvarfi, Turnahvarfi, Kleifakór og Arnarnesvegi.

Opið sé fyrir tilboð í lóðir í fyrsta áfanga til 21.maí.