Berst gegn kvíaeldi á jörð sem hann telur sína

Katrín Oddsdóttir, lögmaður landeigandans, segir kvíar sem Arctic Sea Farm hafa þegar komið fyrir í Djúpinu vera í bullandi ólögmæti og að lögbannsbeiðnin sé lokaúrræði til að „hrista þessa íslensku stjórnsýslu til lífs“ svo hægt sé að koma náttúrunni til bjargar.

Stærð landareignarinnar vanmetin

Samkvæmt umfjöllum BB stefnir Arctic Sea Farm að því að setja út 1 ti 1,5 milljón seiða af frjóum eldislaxi í maí næstkomandi í kvíastæði við Sandeyri en fyrirtækið fékk rekstrarleyfi frá Matvælastofnun í síðasta mánuði. Á sama tíma fékk fyrirtækið leyfi fyrir kvíastæðum við Arnarnes og Kirkjusund.

Katrín segir stjórnsýsluna ekki hafa tekið mið af netlögunum við veitingu leyfanna.

„Það er búið að vanmeta algjörlega hversu langt landið hans nær út í sjó og fyrir vikið búið að heimila sjókvíaeldi inni á hans eignarjörð sem er galið því hann er alfarið á móti þessu,“ segir hún í samtali við fréttastofu.

Katrín segir landeigandann hafa keypt landið til að verja tíma í friði og ró en enginn hafi hlustað á mótbárur hans við framkvæmdunum. Landeigendur á svæðinu í kring hafi einnig mótmælt fyrirhuguðum sjókvíum.

„Gígantísk frekja“

Í lögbannsbeiðninni koma fram helstu ástæður þess að Katrín og skjólstæðingur hennar telja aðgerðir Arctic Sea Farm ólögmætar. Ásamt því að sjókvíarnar liggi að þeirra mati inni á jarðeign landeigandans telja þau að verði af áformum um sjókvíar á svæðinu komi það til með að ógna siglingaöryggi. Sandeyrarsvæðið sé í ljósgeisla frá Óshólavita og því sé um að ræða aðgerð sem brýtur í bága við lög um vitamál.

Einnig fara þau fram á að nýtt umhverfismat þurfi að liggja fyrir og nýtt álit Skipulagsstofnunar um það mat áður en leyfisveiting verður möguleg. Er það vegna rannsóknar lögreglu á slysasleppingum í öðrum kvíum Arctic Sea Farm. 

„Lögbannskrafan er um það að þetta verði stoppað þangað til að við getum að minnsta kosti fengið úr um það skorið fyrir þessari blessuðu úrskurðarnefnd hvort það hafi verið lögmætt eða ekki að veita öll þessi leyfi. Það er svo mikill asi á þessu. Leyfin eru veitt í lok febrúar og svo eru bara komnar kvíar og allt fyrir einhverjum viku, tíu dögum. Þetta er svo gígantísk frekja hjá þessum stórfyrirtækjum,“ segir Katrín.

Rústa íslenskri náttúru fyrir norskar vellystingar

Hún segir ríkisstjórnina verða að grípa inn í og gera eitthvað í málunum áður en verður um seinan.

„Vegna þess að það er verið að rústa íslenskri náttúru til þess að einhverjir norskir Exit-gaurar geti haft það aðeins betur í einhverjum vellystingum,“ segir Katrín.

„Þarna er ekki brothætt byggð í kring, það er ekkert þorp þarna í kring þar sem hægt er að rökstyðja að sé verið að bjarga einhverjum störfum. Þetta er eyðileggingarafl gegn íslenskri náttúru sem okkur þykir öllum alveg ótrúlega vænt um.“