Úlfurinn gæti farið til Magdeburg

Wolff hefur leikið með Kielce frá 2019 og er samningsbundinn félaginu til 2028. En Bild greinir frá því að hann gæti farið til Magdeburg í sumar. 

Evrópumeistararnir þurfa því að kaupa Wolff frá Kielce og það gæti kostað sitt enda Þjóðverjinn einn allra besti markvörður heims.

Óvissa er með markvarðastöðuna hjá Magdeburg en aðalmarkvörður liðsins, Svisslendingurinn Nikola Portner, féll á lyfjaprófi. Metamfetamín greindist í sýni hans. 

Portner hefur ekki enn verið dæmdur í bann en hann hvorki æfir né spilar með Magdeburg meðan mál hans er til rannsóknar.

Spánverjinn Sergey Hernández hefur varið mark Magdeburg að undanförnu og átti meðal annars stórleik þegar liðið vann Melsungen, 30-19, í úrslitum þýsku bikarkeppninnar um síðustu helgi. Svíinn Mikael Agerfors tók fram skóna til að vera Hernández til halds og trausts meðan Portner er fjarverandi.

Gísli Þorgeir Kristjánsson, Ómar Ingi Magnússon og Janus Daði Smárason leika með Magdeburg. Sá síðastnefndi fer til Pick Szeged í Ungverjalandi eftir tímabilið.

Wolff gæti mætt verðandi samherjum sínum í átta liða úrslitum Meistaradeildar Evrópu en Kielce og Magdeburg leiða þar saman hesta sína. Liðin mættust í úrslitaleik keppninnar á síðasta tímabili þar sem Magdeburg hafði betur, 30-29.

Hjá Kielce leikur hinn 33 ára Wolff með Hauki Þrastarsyni. Hann hefur fjórum sinnum orðið pólskur meistari með Kielce.