„Katrín sagðist ætla að grípa okkur“

Hann segir Grindvíkinga þó enn með margar spurningar hvað varðar framsetninguna og skilyrðin sem sett eru í frumvarpinu. Páll Valur var gestur í Bítinu í morgun.

„En ég hef alltaf talað fyrir því að það verði að mæta hverjum og einum á hans forsendum þannig það fari enginn fari óbættur frá þessum hildarleik, sagði Páll Valur í Bítinu í morgun og að það væri algert grundvallaratriði í þessu máli.

Hann sagði aðstæður fólks misjafnar og að það verði að skoða aðstæður hvers og eins. 

„Katrín sagðist ætla að grípa okkur og fjármálaráðherra, og ríkisstjórnin ætlaði bara að grípa okkur Grindvíkinga algjörlega.“

Páll Valur sagði íbúafundinn í kvöld vera að koma ansi seint. Hann hafi beðið um fund frá því í janúar, og fleiri, þar sem framtíð þeirra yrði rædd og þau myndu í sameiningu leggja á ráðin. Hann sagði bæjarstjórnina hafa gefið það út að þau væru „eiginlega valdalaus“ og að það væri „fáránleg staða“.

Fólk í bæjarstjórn líka í áfalli

„Staðan er ofboðslega erfið. Maður áttar sig alveg á því að fólk sem er í bæjarstjórn er líka fólk sem lendir í áfalli,“ sagði Páll Valur og að hann og aðrir hefðu skilning á því.

Hann sagðist sjálfur hafa setið í bæjarstjórn á síðasta kjörtímabili og að staðan hefði alls ekki verið erfið þá. Hann myndi samt sem áður vilja sjá bæjarstjórnina hafa meira að segja um stöðuna sem er komin upp.

Spurður hvað brenni á fólki núna sagði Páll Valur frumvarpið um húsnæðisstuðning og aðgangur fólks vegna fyrirtækja meðal þeirra stóru mála sem þarf að ræða á íbúafundinum seinni partinn í dag.

„Það hefur hleypt gríðarlega illu blóði í fólk að á sama tíma og Bláa lónið fær að opna og taka á móti gestum fái grindvísk fyrirtæki ekki að fara og starfa,“ sagði Páll Valur og að ef hann fengi einhverju að ráða myndi hann loka bænum, sérstaklega eftir að banaslys varð í janúar þegar Lúðvík Pétusson hvarf ofan í sprungu.

„Þetta er sá tími árs sem allt er á fullu. Þau vilja komast inn í bæinn til að vinna, með öllum þeim öryggisráðstöfunum og mótvægisaðgerðum sem að eru settar á móti.“

Ákvörðun embættis ríkislögreglustjóra um brottflutning úr Grindavík vegna hættumats rann út á miðnætti. Fram kom í tilkynningu frá almannavörnum í gærkvöldi að lögreglustjórinn á Suðurnesjum, Úlfar Lúðvíksson, fengi þá valdið til að segja af eða um aðgang að bænum í vikunni. Honum er einnig heimilt að gera breytingar á fyrirkomulagi. Á vef RÚV segir að Úlfar muni tilkynna um nýtt fyrirkomulag um hádegisbil í dag.