Rúnar Alex sagður lenda í Kaup­manna­höfn

Þetta segir danski miðillinn bold.dk og kveðst hafa heimildir fyrir því. Miðillinn segir að Rúnar Alex verði annar markvörður FCK á eftir Kamil Grabara, en Grabara mun í sumar ganga til liðs við Wolfsburg í Þýskalandi.

Uppfært klukkan 13.23: B.T. segir að Rúnar Alex komi frítt til FCK og að samningur hans við félagið gildi til sumarsins 2027.

Rúnar Alex, sem er 28 ára gamall, var lánaður til Cardiff í haust og stóð til að hann yrði hjá Cardiff út tímabilið. Í morgun var greint frá því að svo yrði ekki, og að Cardiff væri að klófesta nýjan markvörð.

Ekki kemur fram í frétt bold.dk hvort Rúnar Alex komi til FCK að láni eða hvort Arsenal hafi selt hann, en samningur KR-ingsins fyrrverandi við Arsenal átti að gilda til næsta sumars.

Rúnar Alex hefur áður spilað í Danmörku því hann hóf atvinnumannsferil sinn með Nordsjælland þar sem hann var á árunum 2014-2018. Hann fór svo til Dijon í Frakklandi og þaðan til Arsenal árið 2020 og gerði samning til fjögurra ára. Frá Arsenal hefur Rúnar Alex farið að láni til OH Leuven í Belgíu, Alanyaspor í Tyrklandi og nú síðast Cardiff en hann lék aðeins sex leiki með velska liðinu í ensku B-deildinni í vetur.