„Það er ekkert eld­gos að byrja“

Víðir Reynisson, yfirlögreglustjóri almannavarna var til viðtals í beinni útsendingu í kvöldfréttum Stöðvar 2 þar sem hann fór yfir stöðuna. Hann sagði að miklar skemmdir hafi orðið á vegum og ábendingar borist um að hlutir hafi fallið úr hillum og sprungur orðið á húsum.

„Þetta gæti verið upphafið að því ferli sem við höfum verið að bíða eftir, að kvika brjóti sér leið til yfirborðs en það eru samt engar vísbendingar um að það sé að gerast enn. Þannig það er ekkert eldgos að byrja, alla vegana ekki á næstunni og engar rýmingar eða neitt slíkt.“

Staðan breyti engu fyrir íbúa í Grindavík þó hún sé óþægileg. „Jörð hefur skolfið nánast stanslaust í þrjá klukkutíma,“ segir Víðir.

Engin ástæða sé fyrir Grindvíkinga að fara úr bænum.

„Nei það er engin ástæða til þess en við skiljum það mjög vel að fólk fer eins og við höfum heyrt, en það eru engin tilmæli frá okkur um slíkt enn.

Allt starfsfólk almannavarna sé komið á vaktina.