„Mæli með að öll pör prófi þetta“

„Við förum alltaf á stefnumót á miðvikudögum,“ segir Harpa og heldur áfram: 

„Upphaflega voru miðvikudagskvöldin okkar heilögu kvöld en það var ekkert sérstaklega skipulagt hvað við myndum gera hverju sinni, nema það að við skiptumst á að ákveða. Oft endaði það hálf kaótískt en svo spratt hugmyndin upp um miðana. Það virkar þannig að við skrifum miða, ég fimm og hann fimm og setjum í krukku. 

Við skrifum þá í samráði svo sama hugmyndin komi ekki upp tvisvar og vitum því hvað stendur en ekki hvenær og hvort okkar dregur miðann hverju sinni. Sá sem dregur hann framkvæmir stefnumótið með sínum hætti. Stefnumótin geta kostað pening en líka verið ókeypis. Eins geta þau krafist þess að við þurfum pössun eða átt sér stað heima eftir að börnin eru sofnuð.“

Miðvikudagskvöldin extra spennandi

Hjónin eiga tvö börn á aldrinum eins og fjögurra ára og Harpa tekur fram að flest kvöld séu þau öll saman. 

„Miðvikudagskvöldin eru samt alltaf extra spennandi og ég mæli með að pör prófi þetta. 

Mér finnst sérstaklega skemmtilegt þegar það fellur í hlut Sigþórs að plana deitið því þá veit ég ekkert hvað ég er að fara að gera. Það er rosalega spenna í því. 

Vissulega hef ég grun því ég veit hvaða möguleikar leynast í krukkunni en ekki hver þeirra það verður hverju sinni. Manni hlakkar alltaf til að eyða kvöldinu með manneskjunni sinni og mér finnst við njóta samverustundanna miklu betur. Nándin verður meiri og oft skapast betri tími fyrir innihaldsrík samtöl.“

Pastagerð og langur göngutúr standa upp úr

Harpa nefnir dæmi um stefnumót þar sem hjónin púsluðu heila kvöldstund. 

„Við erum hvorugt sérstaklega spennt fyrir því að púsla en þarna skapaðist rými þar sem við vorum bara tvö, ekkert sjónvarp eða sími heldur samvera.“

Spurð um uppáhalds stefnumót nefnir Harpa annars vegar kvöldstund þar sem hjónin útbjuggu pasta frá grunni en hins vegar langa gönguferð. 

„Ég man hvað ég var sjúklega þreytt þetta kvöld og krossaði putta um að miðinn með kósý bíókvöldinu þar sem við drægjum dýnuna fram í stofu kæmi upp úr krukkunni. Það reyndist hins vegar ekki gerast og upp kom miði um langa gönguferð sem endaði í ísbúðinni. Ég gleymi aldrei þessarri gönguferð því þarna ræddum við í fyrsta skipti hluti sem við höfðum aldrei talað um áður. Það hefði ekki gerst fyrir framan sjónvarpið heima.“

Gríðarlegar vinsældir á TikTok

Það var svo í haust sem hjónin tóku upp á því að búa til myndbönd með miðagerðinni og fylgdu þeim eftir með stefnumótunum í kjölfarið. Viðbrögðin voru gríðarleg og hefur ekkert myndband fengið minna en 10 þúsund áhorf á TikTok, það vinsælasta 28 þúsund. Harpa segist orðlaus yfir viðtökunum. 

„Við áttum alls ekki von á að þetta yrði svona vinsælt en sýnir eflaust það að fleiri en við eru í þessum hugleiðingum. Það er gaman að gefa fólki hugmyndir og við ætlum að halda því áfram. Markmiðið er að hvetja fólk til að vera meira saman án þess að vera í símanum eða að horfa á sjónvarpið.“

Hér fyrir neðan má sjá nokkur af myndböndunum vinsælu.