„Það er í lagi að líkami þinn beri sögu um barnsburð“

„Þessi póstur er fyrir allar þær sem eru að gera allt sem þær geta til þess að samþykkja breytinguna á líkamanum eftir það stóra kraftaverk sem það er að bera börn,“ skrifar Erna á Instagram.

Erna er talskona fyrir jákvæða líkamsímynd og heldur úti Instagram reikningum Ernuland.

Hún segir líkama hvers og eins einstakan og óraunhæft að bera sig saman við ferli annarra. Fyrir og eftir barnsburð.

„Það er í lagi að líkami þinn beri sögu um barnsburð. Það er fallegt og eðlilegt. Það er í lagi að líkaminn hefur mögulega tekið á sig breytta mynd, varanlega mynd á þann hátt að allar breytingar eftir þessa eru í takt við þann líkama sem hefur borið barn,“ segir Erna.

Hamingjan meira en útlit

Að sögn Ernu er hún þakklát fyrir sinn sterka líkama þar sem hann hefur gengið í gegnum margt.

„Ég þakka fyrir að hann stendur, sterkur og heill eftir þetta allt. Það er ekki sjálfgefið eftir áföll, erfiða tvíburameðgöngu, keisara og fleira að standa upprétt og sterkari en ég hef nokkurn tímann verið, þrátt fyrir kviðslit og gliðna magavöðva. Hann er sterkur því ég næri hann og elska. Það skiptir líka öllu máli.“

Erna segir líkama sinn ekki hafa skroppið saman, bounced back, og hún þurfi reglulega að minna sig á að fyrir og eftir myndir annarra kvenna við meðgöngu tengist ekki hennar líkamlega vegferð. Hamingja hennar felist ekki í því. 

„Ég mæli hamingjuna mína í augunum á börnunum mínum, svefni, þoli, styrk og ævintýrum með fjölskyldunni,“ segir Erna sem birti fallega mynd af sér og tvíburasonum hennar, sæl á svip.

Erna á þrjú börn með eiginmanni sínum Bassa Ólafssyni. Fyrir á Bassi eina dóttur.

Hjónin eru nýlega flutt til Danmerkur þar sem lífið virðist leika við þau.

Fitufordómar geta leitt til mismununar

Í viðtali við Evu Laufeyju Kjaran í Íslandi í dag árið 2021 segir hún frá því að allt niður í fimm ára íslenskar stelpur séu farnar að hafna líkama sínum. Eitt af því sem hefur áhrif á líkamsímyndina eru fordómar, fitufordómar er hugtak sem hefur verið mikið á milli tannana á fólki og segir Erna fitufordóma birtast í andúð innan samfélagsins gagnvart feitu fólki sem leitt getur til mismununar.

„Líkamsvirðing er eitthvað sem er mjög mikilvægt inn í umræðuna þegar kemur að jákvæðri líkamsímynd. Mér finnst svolítið absúrd að vera fagna sínum eigin líkama en við ætlum ekki að gefa öðrum rými fyrir það sama. Fitufordómar eru auðvitað bara kerfisbundið ofbeldi. Það að hafa þessa skoðun á öðrum í rauninni bara til þess að niðurlægja fólk er eitthvað sem við þurfum að fara gera betur í. Það verða allir að fá rými til þess að elska sjálfan sig. Burt sé frá holdafari og heilsu. Því ef þau fá ekki rýmið, hvernig eiga þau þá að öðlast almennt heilbrigði.“

Hér að neðan má sjá innslagið í heild sinni.

Erna gaf út bókina, Fullkomlega ófullkomin, árið 2018 sem fjallar um jákvæða sjálfsímynd ásamt reynslusögum kvenna.  Tveimur árum síðar gaf hún út bókina, Ég vel mig, sem er tieinkuð ungmennum.