„Engir múslimar hér í kvöld“ átti að vera grín

Þetta segir Hannes í svörum til Vísis en Hannes óskaði eftir því að fá spurningar sendar skrif­lega. Að­fara­nótt laugar­dags skrifaði Hannes færslu á Face­book þar sem hann sakaði konu í „múslima­búning“ um að hafa reynt að ræna af sér tösku sinni í Leifs­stöð.

Vísir gerði í­trekaðar til­raunir til að ná tali af Hannesi vegna málsins á laugar­dag. Ung kona, starfs­maður í Leifs­stöð, sagði í við­tali við frétta­stofu um helgina að hún hefði orðið vitni að at­vikinu. Hannes hefði öskrað á tvær ungar stelpur sem hafi tekið tösku hans í mis­gripum og svo á móður þeirra þegar hana bar að garði.

Í svörum til Vísis nú segir Hannes að ekki hafi verið um stór­mál að ræða og hyggst hann ekki leita til lög­reglu vegna málsins.

„Mér finnst hins vegar leiðin­legt, hvernig blaða­kona á Vísi gabbaði ó­reynda unga stúlku, sem starfar á Leifs­stöð, til að gefa alls konar yfir­lýsingar, sem voru alls ekki við hæfi, að starfs­fólk gæfi. En ég óska stúlkunni alls góðs og er viss um, að hún læri fram­vegis að gæta betur orða sinna.“

Telur ekki að hann hafi hlaupið á sig

Um­ræðan á Face­book þræði Hannesar varð afar hörð og var Hannes sakaður um ras­isma og þá var honum einnig hótað líf­láti vegna málsins í umræðum við þráðinn. Hann segist ekki hafa vitað um neinar slíkar hótanir.

„Ég les satt að segja fæst af þessu og hef engar á­hyggjur af því. Ís­lendingar voru pappírs­víkingar að fornu og nú eru þeir orðnir net­víkingar, skrifa digur­barka­legar færslur. Enginn verður með orðum veginn. Mér sýnist nú raunar líka, að lög­reglan hafi nóg að gera við að sinna and­stæðingum hval­veiða.“

Hannes segist ekki telja að hann hafi hlaupið á sig í þessu máli. Taska hans hafi ekki verið svipuð á­sýndar og taska stelpnanna.

„Hefði taskan mín verið svipuð ein­hverri tösku þeirra, hefði fólkið strax séð, að það var með tvær töskur, en ekki eina. Þetta voru ekki inn­ritaðar töskur af færi­bandinu, sem menn geta auð­veld­lega villst á, heldur gerðist þetta í Frí­höfninni. Og þegar ég sagðist eiga töskuna, þrætti fólkið fyrst, en af­henti mér hana síðan.“

Eyddi myndinni af til­lits­semi

Hannes birti í gær­kvöldi mynd úr matar­boði á Face­book. 

„Engir múslimar hér í kvöld,“ skrifaði Hannes við myndina. Hann eyddi henni stuttu síðar en hún hefur síðan farið í dreifingu á sam­fé­lags­miðlum.

„Þetta átti nú að vera gaman­semi. En fólkið, sem var með mér, vildi auð­vitað og skiljan­lega ekki blandast inn í þetta mál, sem er komið langt fram úr sjálfu sér. Ég tók myndina úr birtingu af til­lits­semi við það,“ segir Hannes um myndina.

„Annars get ég sagt, að ég tel, að dæma eigi menn af verkum þeirra, en ekki af kyn­þætti þeirra, trúar­brögðum, stétt, kyni, kyn­hneigð, auði eða völdum. Það er rangt að al­hæfa um hópa, og auð­vitað eru jafn­margir góðir menn og miður góðir í röðum þess eins milljarðs múslima, sem byggja jarðar­kringluna, og í öðrum trúar­flokkum. Ég skal hins vegar játa, að ég er mjög and­vígur öfga­múslimum, sem grýta konur til bana og fleygja sam­kyn­hneigðum ein­stak­lingum út um glugga í há­hýsum.“