Ótrúleg upplifun á vellinum með þessa stemmningu

Áhorfendur hreinlega trylltust í stúkunni, slík var gleðin yfir frammistöðu Jóhönnu Margétar, sem er ein skærasta stjarnan í íslenska hestaheiminum um þessar mundir. Viðar Ingólfsson og Þór frá Stóra-Hofi áttu einnig frábæra sýningu í tölti. 

Gert er ráð fyrir um 10 þúsund manns á Heimsmeistaramóti íslenska hestsins í Hollandi um helgina. Nokkrir heimsmeistaratitlar eru komnir í hús, veðrið leikur við keppendur, hesta og áhorfendur. Stemningin er mikil á mótinu, áhorfendastúkur stappfullar og mikið fagnað, ekki síst þegar keppendur íslenska liðsins ríða í braut. Mótið hefur staðið yfir alla vikuna en nær hápunkti um helgina þegar úrslit verða riðin.

Sigurbjörn Bárðarson landsliðsþjálfari segist eiga von á því að helgin verði stór. Góð stemning sé í liðinu sem og hjá áhorfendum sem hafa fyllt stúkurnar á mótinu.

Áttu von á því að okkar knapar komi heim með gull?

„Ekki nokkur spurning. Það er þegar komið í sarpinn eitthvað af gulli, þannig að við getum verið mjög glöð á meðan við förum í lokasprettinn og það er mikil hvatning fyrir hina knapana, sem eru að taka við keflinu núna að þetta sé möguleiki og að þetta sé hægt og að halda áfram á sömu nótum, sem maður vonar að gerist.“

Það er mikið undir, baráttan hörð, en fréttastofa náði tali af Jóhönnu Margréti þegar hún hafði nýlokið keppni í dag. Hestur hennar, Bárður frá Melabergi, hefur verið seldur og þetta er því þeirra síðasta keppni, utan úrslitareiðin á sunnudag, en vonir eru bundnar við að þau muni standa uppi sem heimsmeistarar í tölti að móti loknu. 

„Þetta var ótrúlegt. Það er ótrúleg upplifun að vera á vellinum í þessari stemningu. Hesturinn í stuði og þetta var bara ótrúlegt,“ segir Jóhanna Margrét. sem viðurkennir að hún sé klökk á þessari stundu, enda kemur Bárður ekki heim aftur.

„Það er bara þannig og ef hann endar svona þá er það bara algjör draumur. Þetta er engin kveðjustund alveg fyrir okkur. Ég á eftir að fljúga eitthvað út í haust og hjálpa nýjum eiganda með hann, þannig að það er gulrót fyrir mig.“