Frekari á­kvörðun um opnun tekin í fyrra­málið: „Við­bragðs­aðilar að hörfa frá“

Bogi Adolfs­son, for­maður björgunar­sveitarinnar í Grinda­vík, ræddi við frétta­stofu í kvöld­fréttum Stöðvar 2. Þá hafði gossvæðið verið lokað í hálf­tíma. Bogi segir fólk hafa sýnt banninu, sem gripið var til vegna hegðunar göngu­garpa í gær, skilning.

„Þetta hefur bara gengið á­gæt­lega. Fólk hefur alveg skilning á þessu og fattar svona alveg af hverju við erum að þessu held ég,“ segir Bogi.

Snýr fólk við þegar því er sagt að það er búið að loka svæðinu?

„Ja, svona flestir, það þarf stundum að­eins að rök­ræða en það hefst allt saman,“ segir Bogi sem segir að björgunar­sveitir reyni einnig að ræða við þá sem eru illa skóaðir en sést hefur í alls­kyns skó­búnað líkt og sandala og annars­konar tufflur.

Ertu sam­mála lög­reglu­stjóranum í því að loka svæðinu klukkan 18?

„Já já, ég er alveg sam­mála honum í því. Þetta er bara á­kvörðun sem er tekin og við stöndum bara við hana með honum,“ segir Bogi sem segir björgunar­sveitir lítið annað geta gert en að tala við göngu­garpa sem ekki vilji hlýta fyrir­mælum.

Mikil mengun á svæðinu

Úlfar Lúð­víks­son, lög­reglu­stjórinn á Suður­nesjum, segist í sam­tali við frétta­stofu ekki óttast að fólk muni fara aðrar og ó­öruggari leiðir að gosinu á meðan slíkri lokun stendur.

„Ég á nú ekki von á því, enda væri það bara svo erfitt að velja sér ein­hverja aðrar leiðir. Þetta er það sem við leggjum upp með að fólk nýti sér þær leiðir sem eru í boði frá Suður­strandar­vegi. Ég held að þessi á­kvörðun að loka klukkan 18:00 létti störf við­bragðs­aðila. Ég á ekki von á öðru. Það er okkar reynsla.“

Arnar Steinn Elís­son, björgunar­sveitar­maður í að­gerðar­stjórn al­manna­varna, segir í sam­tali við frétta­stofu að við­bragðs­aðilar muni funda um stöðuna í fyrra­málið kl. 8:30 og taka á­kvörðun um hvort svæðið verði opið eða lokað al­menningi þann dag.

„Eins og staðan er núna upp á gossvæðinu er tölu­vert mikil mengun. Það er ekki síst þess vegna sem við erum með svæðið lokað. Við erum að mæla upp í hæstu gildi mengunar, þetta eru grímu­gildi og við­bragðs­aðilar eru að hörfa frá vegna reyks, sem stafar bæði af gróður­eldum og gosinu sjálfu.“