Stærsti skellurinn á þjálfaraferli Heimis Guðjóns

Heimir Guðjónsson, þjálfari FH-liðsins, var þarna að stýra liði í 285. sinn í efstu deild á Íslandi en hefur aldrei fengið svo stóran skell áður.

Þetta er í fyrsta sinn sem lið hans tapar með fimm marka mun í efstu deild. Heimir hefur aftur á móti sjálfur unnið sjö leiki með fimm mörkum eða meira.

Stærsta tap Heimis fyrir leikinn í kvöld kom reyndar á sama stað og það var fjögurra marka tap fyrir næstum því tólf árum.

FH tapaði 4-0 á móti Stjörnunni 29. ágúst 2011. Garðar Jóhannsson skoraði tvö mörk í þeim leik og hin mörkin skoruðu þeir Bjarki Páll Eysteinsson og Þorvaldur Árnason.

Stjörnumaðurinn Daníel Laxdal spilaði báða þessa leiki en var sá eini sem tók þátt í báðum leikunum.

Í gær skoraði Emil Atlason tvö mörk fyrir Stjörnuna en hin mörkin skoruðu þeir Eggert Aron Guðmundsson, Guðmundur Kristjánsson og Ísak Andri Sigurgeirsson.

Ísak Andri reyndist FH-ingum sérstaklega erfiður, lagði upp tvö fyrstu mörkin fyrir Emil, átti stóran þátt í marki Eggerts og fiskaði aukaspyrnuna sem gaf mark Guðmundar.

Fram að leiknum í gær hafði Heimir aðeins einu sinni tapað með fjögurra marka mun en sjö sinnum með þriggja marka mun. Hér fyrir neðan má sjá stærstu töp þjálfarans.