Ást­ráður meðal um­sækj­enda um em­bætti ríkis­sátta­semjara

Sex sóttu um embætti ríkissáttasemjara sem félags- og vinnumarkaðsráðuneytið auglýsti laust til umsóknar í byrjun júní síðastliðins eftir að Aðalsteinn Leifsson sagði óvænt af sér.

Umsækjendur um embættið eru eftirtaldir:

• Aldís Guðný Sigurðardóttir, lektor við viðskiptadeild HR og forstöðumaður MBA-náms og aðstoðarríkissáttasemjari
• Ástráður Haraldsson, settur ríkissáttasemjari
• Hilmar Már Gunnlaugsson, lyfjafræðingur
• Maríanna Hugrún Helgadóttir, formaður og framkvæmdastjóri Félags íslenskra náttúrufræðinga
• Muhammad Abu Ayub, vaktstjóri
• Skúli Þór Sveinsson, sölumaður

Hæfni umsækjenda verður metin af ráðgefandi hæfnisnefnd sem skipuð er á grundvelli laga um réttindi og skyldur starfsmanna ríkisins. Félags- og vinnumarkaðsráðherra mun skipa í embættið til fimm ára, að því er segir í tilkynningu á vef Stjórnarráðsins.

Ástráður Haraldsson hefur reynslu af ríkissáttasamningum, en hann var settur ríkissáttasemjari í deilu Eflingar og Samtaka atvinnulífsins í vetur.