Aki-Matilda Høegh-Dam sækist eftir for­mennsku í Siumut

Sermitsiaq greinir frá þessu. Framundan er því formannsslagur en Kim Kielsen, fyrrverandi formaður og fyrrverandi forsætisráðherra, og Erik Jensen, núverandi formaður, hafa báðir tilkynnt um framboð til formennsku.

Siumut á aðild að stjórn Múte Bourup Egede, formanns Inuit Ataqatigiit, ásamt flokknum Naleraq.

Það eru svæðisstjórnir flokksins sem ákveða hver geti formlega boðið sig fram til formennsku í flokknum og miðstjórnar. Hin 26 ára Aki-Matilda Høegh-Dam segist sjálf hafa fengið fjölda áskorana um að bjóða sig fram til formennsku. Hún segist nú vilja gera það, fái hún grænt ljós frá svæðisstjórn.

Aki-Matilda Høegh-Dam var kjörin á danska þingið sem annar fulltrúa Grænlendinga árið 2019 og aftur 2022. Hún vakti nýverið athygli í Danmörku þegar hún neitaði að tala dönsku úr ræðustólnum í danska þinginu og sagðist einungis vilja tjá sig á grænlensku.

Høegh-Dam styður sjálfstæði Grænlands.