Sigurður Þórðarson mætir á nefndarfund

Þórunn Sveinbjarnardóttir formaður nefndarinnar staðfesti þetta við Vísi nú skömmu fyrir fund sem hefst 09:10. Meðal dagskrárliða eru „gestir“ og sá gestur er Sigurður.

„Já, hann hefur þegið boð um að mæta á lokaðan fund hjá nefndinni,“ segir Þórunn í samtali við Vísi.

Mikið hefur gengið á innan þings og utan vegna greinargerðar Sigurðar Þórðarsonar. Þar fjallar hann um niðurstöður rannsóknar sinnar á starfsemi Lindarhvols ehf, félags sem stofnað var til af Bjarna Benediktssyni, þáverandi og núverandi fjármálaráðherra.

Sigurður ósáttur með þróun mála

Tilgangur félagsins var sá að annast umsýslu, fullnustu og sölu, eftir því sem við á, á eignum ríkissjóðs, mótteknum eftir bankahrun, svokallað stöðugleikaframlag. Mikil leynd hefur hins vegar ríkt um hvernig að málum var staðið. Sigurður vann rannsókn í tvö ár en því máli var svo kippt úr höndum hans þegar hann var á lokametrum rannsóknar sinnar af þáverandi ríkisendurskoðanda, Skúla Eggert Þórðarsyni. 

Skúli sendi svo frá sér skýrslu um Lindarhvol, sem er í megindráttum á þá leið að starfsemin hafi verið með ágætum. Sigurður hefur sagt að sú niðurstaða sé ekki í neinu samræmi við það sem rannsókn hans til tveggja ára hafi leitt í ljós. Þá hefur Sigurður lýst því að illt sé að sitja undir því sem hann metur sem ávirðingar á hendur sér, og hann metur það sem svo að greinargerð sín sé opinbert plagg, sem hann sendi til þingsins, en ekki þá sem einkabréf til þáverandi forseta Alþingis; Steingríms J. Sigfússonar.

Trúnaður ríkir um það sem sagt er á lokuðum nefndarfundi

Til stóð að halda opinn fund stjórnskipunar- og eftirlitsnefndar, en Sigurður og aðrir færðust undan því. Meðal annars á þeim forsendum að það hefði ekkert upp á sig að mæta á fund þar sem honum væri meinað að ræða efni greinargerðar sinnar. En sú er afstaða Birgis Ármannssonar, forseta Alþingis, þrátt fyrir að meirihluti forsætisnefndar, reyndar allir nema Birgir, telji vert að greinargerðin verði lögð fram. Núverandi ríkisendurskoðandi, Guðmundur Björgvin Helgason hefur sagt að hann telji greinargerð Sigurðar vinnuplagg Ríkisendurskoðunar og það eigi ekki að birta.

Þórunn segist ekki vita hvers megi vænta eða hvort vitnisburður Sigurðar fyrir nefndinni leiði til einhvers. Hún minnir á að trúnaður ríki um það sem þeir sem kallaðir eru fyrir þingnefndir segi við slík tækifæri. „Þetta er lokaður fundur og þingmenn geta ekki vitnað til þess sem þar kemur fram.“