Risakvöld framundan fyrir bardagaíþróttir á Íslandi

Aron Guðmundsson skrifar 3. júní 2023 11:00

Mynd frá Unbroken deildinni Mynd: Mjölnir

Úrslitakvöld Unbroken deildarinnar fer fram í kvöld, laugardaginn 3. júní. Þar munu úrslitin ráðast í fyrstu deildarkeppninni í uppgafarglímu á Íslandi.

Eftir þrjá keppnisdaga (janúar, febrúar og mars) Unbroken deildarinnar ráðast úrslitin á laugardaginn í Tjarnarbíói. Þar munu efstu tveir keppendurnir í hverjum flokki mætast í hreinni úrslitaglímu.

Deildinni var skipt í byrjendadeild (minna en tveggja ára reynsla af glímu) og úrvalsdeild. Úrslitin í byrjendadeildinni hefjast klukkan 16:00 og úrvalsdeildin klukkan 19:30. Það verða 7 glímur í byrjendadeildinni og 6 í úrvalsdeildinni.

Auk þess verða 3 ofurglímur í lokin þar sem erlendir keppendur mæta okkar allra bestu glímumönnum. Erlendur keppendurnir eru allt frábærir glímumenn sem mæta sérstaklega hingað til lands til að keppa á viðburðinum.

Valentin Fels vs. Marcin Held

Í aðalglímu kvöldsins verður Valentin Fels gegn Marcin Held. Valentin er franskur glímumaður sem hefur verið búsettur hér á landi í hálan áratug. Hann er einn af allra bestu glímumönnum landsins og þjálfar bæði hjá Mjölni og Brimi á Akranesi.

Andstæðingur hans, Marcin Held, er frábær glímumaður sem hefur getið sér gott orð í MMA heiminum. Marcin hefur barist í UFC, Bellator og berst nú í PFL. Marcin er þekktur fyrir frábæra takta á gólfinu og var aðeins 21 árs gamall þegar hann fékk svarta beltið í brasilísku jiu-jitsu.

Ómar Yamak vs. Lee Hammond

Ómar Yamak er svart belti í brasilísku jiu-jitsu og hefur verið einn besti glímumaður landsins undanfarin ár. Hann mætir Lee Hammond sem hefur lengi verið meðal efnilegustu bardagakappa Írlands.

Lee er 5-0 sem atvinnumaður í MMA og er í nýjustu seríu The Ultimate Fighter. Lee verður þar í liði Conor McGregor enda æfir Lee hjá SBG og hefur lengi æft með Conor á Írlandi. Lee er frábær glímumaður en hann hefur bæði unnið British Nogi Championship og IBJJF Irish Championship. Það er frábært að fá hann hingað til lands og má búast við afar skemmtilegri glímu við Ómar.

Kristján Helgi vs. Mohammed Avtarhanov

Kristján Helgi Hafliðason hefur farið hamförum á glímumótum hérlendis undanfarin tvö ár. Hann hefur gjörsigrað mótherja sína og unnið öll stóru mótin hérlendis síðustu ár. Hann mætir Mohammed Avtarhanov frá Írlandi.

Mohammed er aðeins tvítugur en hefur glímt í fjölmörg ár. Hann er fimmfaldur Írlandsmeistari, á 3 titla á Grapple Kings, Evrópumeistari unglinga, margfaldur meistari á Dublin Open og klárar 88% viðureigna sína á uppgjafartaki.