„Hlaut að koma að því að maður færi að skora“

Hann hefur skorað þrjú mörk í fyrstu þremur leikjum tímabilsins og loksins náð að sanna sig í stóru hlutverki í efstu deild.

„Ef maður efaðist aldrei væri maður ekkert í þessu. Auðvitað hugsar maður bara um einn leik í einu en það skiptir ekki máli alltaf að skora, ég hugsa bara um að vinna leikina. Það er númer eitt, tvö og þrjú,“ segir Örvar.

Örvar er gríðarlega kraftmikill leikmaður og varð til að mynda bikarmeistari í hástökki árið 2019 þegar hann stökk yfir 2 metra, þrátt fyrir að vera hættur frjálsíþróttaiðkun nokkrum árum áður.

Oftar en ekki hefur hann verið gagnrýndur fyrir að skora ekki nóg en hann hefur svo sannarlega svarað fyrir það í upphafi móts.

„Maður er búinn að vinna fyrir þessu lengi. Það hlaut að koma að því að maður færi að skora eitthvað,“ segir Örvar kátur.

Hann hefur lagt mikla vinnu á sig undanfarin ár og hefur uppskorið í byrjun tímabilsins. Hann segir að það hafi gefið honum aukið sjálfstraust að skora snemma leiks á móti Breiðablik í fyrstu umferð.

„Þetta er blanda af öllu. Maður er búinn að vera duglegur hjá Boga að lyfta undanfarin 2-3 ár. Það er helvíti mikil sprengja sem kemur þaðan. Ég hef verið í ólympískum lyftingum og unnið í grunnþolinu. Hann er besti styrktarþjálfari á landinu og ég hef grætt þvílíkt mikið á því að vera hjá honum,“ segir Örvar um bróður sinn Boga Eggertsson styrktarþjálfara.

Örvar er gríðarlega ánægður með þjálfara sinn hjá HK, Ómar Inga Guðmundsson.

„Það er alltaf eitthvað upplegg hjá Ómari. Svo fær maður alltaf smá frjálsræði en hann er duglegur að segja manni til þannig að þetta er æðislegt,“ segir Örvar.

Þrátt fyrir góða byrjun sína á mótinu segist hann ekki finna fyrir aukinni pressu. „Maður þarf að taka ábyrgðina sem kemur á mann og vera bara tilbúinn að leggja sig fram í leikjum.“

Fyrsta mark Örvars kom eftir nokkrar mínútur af mótinu í 4-5 sigri á móti Breiðablik. Í þeim leik gerði hann varnarmönnum Íslandsmeistaranna gríðarlega erfitt fyrir enda fáir líkamlega sterkari en Örvar í deildinni.

„Það er mun betri fótbolti í Bestu deildinni en Lengjudeildinni. Þar er áherslan meiri á líkamlega burði en minni fótbolta. Maður finnur fyrir augljósum mun og maður má ekki gleyma sér í eina sekúndu eins og gerðist á móti Stjörnunni þegar við fengum á okkur þrjú mörk á minna en fimmtán mínútum.“

Uppalinn í FH

Örvar er uppalinn FH-ingur en fór árið 2017 til Víkings Reykjavíkur til að fá mínútur í meistaraflokksbolta. Hann var hjá félaginu til ársins 2019 og kom við sögu í alls 36 leikjum í efstu deild.

Eftir það fór Örvar til Fjölnis og spilaði 15 leiki í efstu deild í vængbakverði og byrjaði flesta leikina. Það ár féll Fjölnir örugglega en Örvar gerði nóg til þess að efstu deildar lið HK krækti í kappann.

Síðan þá hefur Örvar verið í HK. Hann spilaði 20 leiki í efstu deild 2021 þegar liðið féll niður í fyrstu deild. Örvar hélt tryggð við HK, spilaði 22 leiki, skoraði 6 mörk og hjálpaði liðinu að komast á nýjan leik upp í efstu deild.