Óvissa uppi varðandi framtíð Hamilton hjá Mercedes

Aron Guðmundsson skrifar 19. apríl 2023 17:16

Sjöfaldi Formúlu 1 heimsmeistarinn Sir Lewis Hamilton, ökumaður Mercedes AP Photo/Luca Bruno

Samningur sjöfalda Formúlu 1 heimsmeistarans Lewis Hamilton við Mercedes rennur út eftir yfirstandandi tímabil og enn virðist ekkert bóla á nýjum samningi. Þrátt fyrir yfirlýsingar ökumannsins og liðsstjóra Mercedes hafa sögusagnir um mögulegt brotthvarf Hamilton frá þýska risanum bara orðið háværari eftir því sem vikurnar líða.

Byrjun Mercedes á yfirstandandi keppnistímabili í Formúlu 1 hafa ekki orðið til þess að þagga niður í orðrómunum. Mercedes er nú þegar 67 stigum á eftir Red Bull Racing í stigakeppni bílasmiða og Hamilton sjálfur 31 stigi á eftir ríkjandi heimsmeistara ökumanna, Hollendingnum Max Verstappen sem leiðir stigakeppni ökumanna.

Toto Wolff, liðsstjóri Mercedes, hefur áður látið hafa það eftir sér að Mercedes sé ekki að undirbúa sig fyrir mögulegt brotthvarf Hamilton frá liðinu.

„Ég vil ekki taka upp viðræður við aðra ökumenn vegna þess að ég er ánægður með þá ökumenn sem eru á mála hjá okkur,“ segir Wolff í samtali við Motorsport.com. „Hvað eitthvað plan B varðar þá er það ekki til.“

Að sama skapi hefur Hamilton reynt að tala niður sögusagnir um mögulegt brotthvarf sitt frá Mercedes.

„Hvað mig varðar er aðalástæðan fyrir veru minni hjá Mercedes sú að ég vil hjálpa liðinu að sækja fram og leggja mitt af mörkum hvað það varðar,“ sagði Hamilton í viðtali á keppnishelgi Formúlu 1 í Sádi-Arabíu á dögunum. „Ef það kemur að þeim tímapunkti að mér finnst ég ekki geta það lengur, þá er það tímapunkturinn til þess að taka inn yngri ökumann.“

Hinn 38 ára gamli Hamilton hefur verið á mála hjá Mercedes frá árinu 2013 og þar hefur hann verið hluti af mögnuðu gengi liðsins undanfarinn áratug.

Hjá Mercedes hefur Hamilton unnið sex heimsmeistaratitla og hefur allt í allt orðið heimsmeistari ökumanna sjö sinnum. Þar stendur hann jafnfætis Formúlu 1 goðsögninni Michael Schumacher.