Ásgeir Örn: Þetta er brandari sem er verið að bjóða uppá

„Þetta var lélegur leikur hjá okkur. Við mætum ekki til leiks og erum ofboðslega lengi í gang. Við náum samt upp mjög góðum seinni hálfleik sem er okkar getu stig. Ef við hefðum mætt til leiks þá hefðum við unnið þetta.“

Haukar mættu ekki í fyrri hálfleikinn. Þeir spiluðu ragan sóknarleik og óagaðan varnarleik og voru fimm mörkum undir í hálfleik

„Þetta var skelfilegt. Menn voru að hugsa um eitthvað annað og ætluðu að gera eitthvað annað, því fór sem fór.“

Það var allt annað að sjá Hauka í seinni hálfleik þar sem þeir þéttu varnarleikinn og skoraði Grótta ekki fyrstu tíu mínúturnar, einnig komst taktur á varnarleikinn.

„Við breytum um varnarleik, við förum aðeins framar og erum miklu þéttar. Við mættum til leiks og vorum klárir þá. Við náðum þessu þá upp tiltölulega fljótt.“

Í lokasókn Hauka skoraði Stefán Rafn Sigurmannsson mark og kom Haukum yfir. Dómararnir voru ekki sammála og annar dæmdi línu á meðan hinn dæmdi miðju. Grótta skoraði og eftir fund við dómaraborðið var komist að þeirri niðurstöðu að mark Gróttu skyldi standa en mark Hauka dæmt af. Ásgeir var virkilega ósáttur með niðurstöðuna.

„Mér finnst þetta fíaskó, mér finnst þetta ótrúlegur amatörismi sem var verið að bjóða hérna uppá. Þeir voru búnir að dæma leikinn fínt í 58 mínútur svo dæmir hann línu sem ég sé ekki. Ég skil ekki afhverju það er verið að dæma miðju þegar að það er búið að vera dæma línu hérna megin. Auðvitað fipast okkar leikmenn við það og þeir koma hérna upp og skora. Þetta er brandari sem er verið að bjóða uppá.“