Örfáar stangir lausar í Elliðaánum

Umsóknarþunginn í Elliðaárnar hefur líklega aldrei verið meiri hjá félagsmönnum SVFR eins og hann var í vetur en ástæða þess er afar einföld. Það er líklega ekki hægt að komast í betri, ódýrari og jafn barnvæna veiði og í ánni en þarna hafa fjölmargir ungir veiðimenn einmitt fengið sína fyrstu laxa. Þegar reglum í ánni var breytt í þá átt að aðeins mátti veiða á flugu og öllu sleppt voru ýmsar efasemdaraddir uppi um að aðsókn í árnar myndi dragast saman en sú hefur ekki orðið raunin.

Nú þegar úthlutun er lokið fara lausar stangir á vefsölu félagsins en það verður að segjast eins og er að ef þú ætlar að eiga einhvern möguleika á að kasta flugu í Elliðaárnar þarftu að vera nokkuð röskur eða rösk því það eru aðeins örfáar stangir eftir í september lausar en sá tími getur verið fantagóður.