Leyndar­hyggjan um Lindar­hvol enn á dag­skrá þingsins

Þórhildur Sunna segir í samtali við Vísi að þau svari ágætlega þeim fyrirslætti sem Birgir hafi boðið upp á þegar hann vill standa í vegi fyrir að greinargerð Sigurðar Þórðarsonar setts ríkisendurskoðanda um Lindarhvol verði gerð opinber. Allir í forsætisnefnd hafa lýst því yfir að þeir vilji birta greinargerðina en Birgir, sem er formaður nefndarinnar, hefur beitt neitunarvaldi sínu.

Vísir fjallaði í gær um harða umræðu á þinginu sem fram fór um málið á Alþingi á mánudag, þar sem til dæmis Jóhann Páll Jóhannsson þingmaður Samfylkingar sagði að leyndin væri orðin pínleg og að sjálfstæðum ímyndarvanda fyrir þingið. Það rímar við orð Sigurðar sjálfs sem hefur látið þess svo getið að leyndarhyggjan sé orðin verri en það sem í skýrslunni er og þoli ekki dagsljósið, hann hefur aldrei fengið útskýringar á því.

„Fólk er hætt að treysta okkur“

Ekki er úr háum söðli að falla þegar virðing fyrir þinginu er annars vegar. Guðbrandur Einarsson þingmaður Viðreisnar er einn þeirra sem tók til máls. Hann vitnaði í Vísi og taldi fyrirsögnina „Leyndin um Lindarhvol orðin að sjálfstæðum ímyndarvanda fyrir þingið“ ramma ágætlega inn þá stöðu sem upp væri komin. 

„Í nýlegri könnun um traust á stofnunum kemur í ljós að þingið er að tapa talsverðu af því trausti sem það þó hafði, sem var nú kannski ekki svo mikið. En maður veltir því þá fyrir sér: Hver er ástæðan? Getur þetta meðal annars verið ástæðan? Fólk er hætt að treysta okkur. Á mínum stutta ferli hér á þingi er ég er búinn að upplifa Íslandsbankasöluna sem bjó til mikla úlfúð í samfélaginu, við erum búin að upplifa ÍL-sjóðinn og nú erum við að upplifa þennan Lindarhvol. Hversu lengi ætlum við að halda svona áfram?“ spurði Guðbrandur.

Birgir og Bjarni Benediktsson fjármálaráðherra hafa staðið í vegi fyrir birtingunni, Bjarni segir að fyrir liggi skýrsla og það geti bara verið ein skýrsla.

Vill geta rætt álitamál fyrir opnum tjöldum

Þingmenn stjórnarandstöðunnar gefa ekki mikið fyrir þá röksemdafærslu en málið var tekið upp enn og aftur á þinginu í gær. Þórhildur Sunna var málshefjandi og sagði að í fundarstjórn forseta í gær (mánudag) hafi mátt skilja Birgi sem svo að það sem helst stæði í vegi fyrir birtingu á greinargerð Sigurðar væri afstaða Ríkisendurskoðunar að um vinnuskjal væri að ræða og því mætti ekki birta hana.

„Forseti vísaði í 3. mgr. 15. gr. laga um ríkisendurskoðanda máli sínu til stuðnings en hann virðist trúa því að sú grein skyldi Alþingi til að halda leynd yfir greinargerðinni. 

Frá því að við hæstvirtur forseti ræddum um þetta mál í gær ásamt öðrum háttvirtum þingmönnum í fundarstjórn forseta hef ég fengið ábendingu um að þau lögfræðiálit sem forsætisnefnd hefur látið framkvæma fyrir sig um þetta mál taki einmitt á þessu álitaefni sem forseti ber hér upp til að verja leyndarhyggju sína. Því tel ég rétt að fara þess á leit við forseta að hann birti þessi lögfræðiálit opinberlega til að við getum rætt þessi álitamál fyrir opnum tjöldum.“

Birgir ætlar að taka ósk Þórhildar Sunnu til athugunar

Fjöldi þingmanna tók undir með Þórhildi Sunnu sem seinna í umræðunni ítrekaði beiðni sína til Birgis, þá ósk að hann birti lögfræðiálit sem forsætisnefnd hefur látið vinna fyrir sig og snúa að birtingu þessara gagna.

„Eins og ég segi, þau taka á þessum álitamálum sem virðulegur forseti ber fyrir sig að séu ástæðan fyrir því að þetta verði ekki birt. Er eitthvað því til fyrirstöðu að lögfræðiálitin séu að minnsta kosti birt á meðan forseti er að velta því fyrir sér hvort lagalegu atriðin standi í vegi fyrir því að greinargerðin skuli birt eða ekki? Getur forseti upplýst þingheim um hvort hann hyggist verða við minni ósk um að birta lögfræðiálitin sem forsætisnefnd hefur látið vinna, m.a. um akkúrat þessa spurningu, lögmæti birtingar?“

Birgir, forseti Alþingis, sagði þá að hann hafi heyrt hvað Þórhildur Sunna hafði um þetta að segja en hann ætlaði sér ekki að svara þeirri spurningu á þessum fundi en það verði að sjálfsögðu tekið til athugunar.