Íslenskt flugfélag fjórði stærsti flugrekandi júmbó-þotunnar

Í fréttum Stöðvar 2 voru sýndar myndir af því þegar síðasta 747-þotan var afhent frá Boeing-verksmiðjunum við Seattle til bandaríska fraktflugfélagsins Atlas í byrjun mánaðarins. Það var 53 árum eftir að Pan Am tók hana í notkun, fyrst flugfélaga.

Sem fyrsta breiðþota heims olli hún straumhvörfum í flugsamgöngum. Stærð hennar og hagkvæmni stuðluðu að því að flugfargjöld lækkuðu og að flugferðir á milli heimsálfa urðu á færi almennings á Vesturlöndum. Sem forsetaflugvél varð hún einnig áhrifamikið tákn í að stimpla Bandaríkin inn sem mesta efnahagsveldi heims.

Við upprifjun á sögu hennar birti flugfréttasíðan Simply Flying lista yfir tíu stærstu flugrekendur í gegnum tíðina. Þar er Air Atlanta Icelandic í fjórða sæti, með eitthundrað þotur, á eftir Atlas Air, Japan Airlines og British Airways, en á undan félögum eins og Singapore Airlines, United Airlines og Lufthansa.

Í höfuðstöðum Air Atlanta í Hlíðasmára í Kópavogi, í Café Atlanta, má sjá myndir af þotunum sem félagið hefur rekið. Forstjórinn leynir því ekki að Atlanta-menn eru stoltir af því að vera á topp-tíu listanum.

„Að sjálfsögðu. Það er ekkert annað hægt,“ svarar Baldvin Már Hermannsson, forstjóri Flugfélagsins Atlanta.

„Þetta kemur pínu á óvart þegar maður sér hversu margar vélarnar í raun eru sem eru búnar að rúlla í gegn hjá okkur. Þetta er bara ekkert sjálfgefið.

Og þegar þú ræðir við aðra flugrekendur og önnur flugfélög úti í heimi erum við klárlega mjög stórt nafn í þessum rekstri. Jú, jú, við erum auðvitað ánægð með það,“ segir Baldvin en um sexhundruð manns starfa núna hjá félaginu, þar af yfir 250 Íslendingar.

Það vakti þjóðarathygli fyrir þrjátíu árum þegar Arngrímur Jóhannsson, stofnandi Atlanta, fékk fyrstu tvær júmbó-þoturnar, vorið 1993.

„Síðan þá, síðastliðin þrjátíu ár, hefur þetta verið aðalvinnuhesturinn í okkar rekstri,“ segir Baldvin.

Langflestar hafa verið skráðar á Íslandi, borið TF-bókstafi landsins, og verið í verkefnum um allan heim en sjást sjaldan hérlendis. Þegar ein þeirra flaug lágt yfir borginni fyrir tveimur árum varð uppnám, svo stór er hún. 

Núna rekur félagið fjórtán 747-fraktþotur og er um þessar mundir að bæta við tveimur 747-farþegaþotum, sem koma í rekstur í næsta mánuði.

Að mati Baldvins á hún enn mörg góð ár eftir.

„Ég held að það sé auðvelt að segja að næstu sex til átta árin er ekkert mál að halda áfram að fljúga 747-þotunum, sérstaklega fraktvélunum.“

„Þetta er „Queen of the Skies“, svo maður sletti, drottning háloftanna. Bæði hvað hún er tignarleg, burðargetan, fluglengdin. Þetta er einstök vél.

Og það er synd að síðasta 747-8, sem er nýjasta týpan, sé komin út úr framleiðslu. Vegna þess að það er ekki til nein flugvél, enn þann dag í dag, sem þú getur horft á að komi mjög auðveldlega og taki við því sem 747-vélin er að gera,“ segir forstjóri Flugfélagsins Atlanta.

Hér má sjá frétt Stöðvar 2: