Hinn 16 ára Daníel Tristan fær tækifæri með aðalliði Malmö FF

Daníel Tristan gekk til liðs við Malmö FF í fyrrasumar en hann er aðeins 16 ára gamall, fæddur árið 2006. Hann hefur leikið með U-19 ára liði félagsins en aðalliðið er nú statt á Spáni í æfingaferð og hefur Daníel Tristan verið kallaður inn í æfingahópinn fyrir æfingaleik sem þar verður spilaður.

Þetta kemur fram á Fotbollskanalen en þar segir að aðallið Malmö FF muni leika tvo leiki á föstudaginn og er Daníel Tristan einn fjögurra leikmanna U-19 ára liðsins sem fengið hefur boð um að spila með aðalliðinu í öðrum leikjanna.

Malmö FF mun fyrst leika gegn norska liðinu Vålerenga þar sem bæði lið munu stilla upp sínum aðalliðum en svo verður annar leikur gegn danska liðinu AGF þar sem aðrir leikmenn sænska liðsins fá tækifæri, þar á meðal Daníel Tristan.

„Hann var í hópnum þegar við spiluðum við Nordsjælland og ég veit að hann er leikmaður sem hefur alla möguleika á að taka næsta skref. Líkamsbyggingin hans er góð miðað við að hann er aðeins 16 ára gamall. Það verður gaman að sjá hann á æfingum, þar fær maður oft ágæta mynd af leikmanninum. Hann er leikmaður sem félagið hefur trú á,“ sagði Henrik Rydström, þjálfari Malmö FF, í viðtali við Fotbollskanalen.

Bræður Daníels Tristans, Sveinn Aron og Andri Lucas leika sömuleiðis í Svíþjóð. Sveinn Aron er á mála hjá Elfsborg en Andri Lucas hjá Norrköping. 

Malmö FF er sigursælasta liðið í sænskri knattspyrnu og hefur unnið sænska meistaratitilinn tuttugu og tvisvar, síðast árið 2021. Liðið endaði í sjöunda sæti sænsku deildarinnar á síðasta tímabili en Henrik Rydström tók við sem þjálfari að tímabilinu loknu.