Dagný tilnefnd sem knattspyrnukona ársins í London

Dagný er ein af fimm leikmönnum sem fá tilnefningu til verðlaunanna í ár, en London Football Awards verða veitt þann 13. mars næstkomandi. Ásamt Dagnýju eru Arsenal-konurnar Beth Mead og Kim Little, og Chelsea-konurnar Sam Kerr og Millie Bright tilnefndar.

Aðeins leikmenn sem leika með félagsliðum í London koma til greina í valinu. Í karlaflokki koma þeir Bukayo Saka (Arsenal), Martin Ødegaard (Arsenal), Ivan Toney (Brentford), Harry Kane (Tottenham) og Aleksandar Mitrovic (Fulham) til greina.

Dagný hefur verið lykilmaður í liði West Ham undanfarin tvö ár, en á yfirstandandi tímabili hefur hún leikið tólf deildarleiki og skorað í þeim fimm mörk.