Portúgalar hlupu yfir Græn­höfða­eyjar og komust upp fyrir Ísland

Fyrsti leikurinn í milliriðli Íslands var kannski meira spennandi en margir bjuggust við en á endanum unnu Portúgalar öruggan sigur á Grænhöfðaeyjum eftir algjör hrun hjá Grænhöfðeyingum.

Spánverjar tryggðu sér sæti í átta liða úrslitum og enduðu um leið vonir Slóvena með því að vinna fimm marka sigur á Slóvenum, 31-26.

Slóvenar voru að berjast fyrir lífi sínu í mótinu og náðu að komast yfir í fyrri hálfleik en eftir hann stóðu liðin jöfn, 15-15.

Slóvenar komust í þrígang yfir í upphafi seinni hálfleiksins en á augabragði fór staðan úr 19-18 fyrir Slóveníu í 21-26 fyrir Spán. Eftir það voru Spánverjar með leikinn í sínum höndum.

Sigur Spánverja þýðir jafnframt að Frakkar eru líka öruggir áfram þrátt fyrir að eiga eftir að spila tvo leiki.

Eftir leikinn eru Spánverjar með átta stig, Frakkar með sex stig og Slóvenar bara fjögur stig. Slóvenar eru með slakari innbyrðis á móti Frökkum og geta því ekki komist upp fyrir þá og auðvitað ekki náð Spánverjum að stigum.

Portúgalar hlupu yfir Grænhöfðaeyjar í seinni hálfleik sem þeir unnu 21-11 og þar með leikinn með tólf mörkum, 35-23.

Portúgalar voru bara tveimur mörkum yfir í hálfleik á móti Grænhöfðaeyjum, 14-12, en settu í gírinn í seinni hálfleiknum þar sem þeir breyttu meðal annars stöðunni úr 19-15 í 30-16 með 11-1 kafla.

Eftir það var engin spenna lengur til staðar eins og í fleiri leikjum hjá Grænhöfðaeyjum á þessu móti sem endað flestir með skrautlegum hætti.

Antonio Areia skoraði níu mörk fyrir portúgalska liðið og Victor Iturriza var með fimm mörk. Delcio Pina var markahæstur hjá Grænhöfðaeyjum mðe sex mörk.

Portúgalar komust upp fyrir Íslendinga með þessum sigri, eru með fimm stig á móti fjórum stigum hjá íslenska liðinu.