Veiðimenn vilja elda sjálfir

Eftirspurn eftir veiðileyfum í bestu árnar er mjög mikil enda er gengið á krónunni hagstætt fyrir þá sem greiða í evrum og dollurum. Erlendum veiðimönnum kemur líklega til með að fjölga á þessu ári ef eitthvað er og það sem vekur athygli er að sífellt fleiri þeirra sækja í veiði þar sem þeir geta eldað sjálfir og losnað við að greiða fyrir fæði í húsi. Flestir en ekki þó allir hafa komið lengi til Íslands að veiða og eru farnir að verða spenntir fyrir kostum eins og veiði í ám þar sem menn sjá alveg um sig sjálfir.

Þetta er einmitt sú veiði sem Íslendingar hafa hingað til fengið að eiga svolítið í friði en það er spurning hversu lengi það endist. Ekki bitnar þetta mikið á veiðileiðsögumönnum en þessir erlendu veiðimenn sækja ennþá í þeirra þjónustu til að þurfa ekki að eyða miklum tíma í að læra á svæðin. Það er þó ekki þannig að það sé flótti úr ánum sem bjóða uppá fulla þjónustu, þvert á móti. Þar er að sama skapi mikil eftirspurn og ljóst að landið verður fullt af veiðifólki, bæði innlendu og erlendu sem njóta þess að veiða. Þá skulum við bara vona að veiðisumarið verði gott.