Handbolti

Stuðningsmenn Kiel spenntir fyrir Viktori Gísla: „Þurfum við að bíða til 2025?“

Ingvi Þór Sæmundsson skrifar
Viktor Gísli Hallgrímsson lék stórvel með Nantes í sjö marka sigri á Álaborg í gær, 35-28.
Viktor Gísli Hallgrímsson lék stórvel með Nantes í sjö marka sigri á Álaborg í gær, 35-28. epa/Anne-Christine Poujoulat

Landsliðsmarkvörðurinn Viktor Gísli Hallgrímsson er orðaður við þýska stórliðið Kiel. Stuðningsmenn liðsins eru afar spenntir fyrir honum.

Danski landsliðsmarkvörðurinn Niklas Landin yfirgefur Kiel eftir þetta tímabil og gengur í raðir Álaborgar í heimalandinu.

Samkvæmt staðarblaðinu í Kiel, Kieler Nachrichten, rennir félagið hýru auga til Viktors og íhugar að fá hann til að fylla skarð Landins. Benjamin Buric, markvörður Flensburg, er einnig undir smásjá Kiel.

Viktor átti stórleik þegar Nantes vann Álaborg í Meistaradeild Evrópu í gær, 35-28. Á meðan leik stóð sögðust nokkrir stuðningsmenn Kiel vera spenntir fyrir Viktori og spurðu hversu lengi hann væri samningsbundinn Nantes. Svarið við því er til 2025 en einum stuðningsmanni fannst full langt að bíða þangað til.

Viktor kom til Nantes frá Danmerkurmeisturum GOG fyrir tímabilið. Hann hefur leikið sem atvinnumaður erlendis síðan 2019.

Viktor hefur verið fastamaður í íslenska landsliðinu undanfarin ár og var valinn í úrvalslið Evrópumótsins í byrjun þessa árs.

Franski handboltinn Þýski handboltinn Meistaradeild Evrópu í handbolta karla

Mest lesið


Fleiri fréttir

Sjá meira


×

Mest lesið