„Það vildi enginn koma nálægt þessu máli hjá lögreglunni“

Fjallað var um það í fréttaskýringaþættinum Kveik á RÚV í gær að Guðjón Valdimarsson, faðir Sigríðar Bjarkar ríkislögreglustjóra, hefði selt minnst þrjá hálfsjálfvirka og ólöglega riffla.

„Það komu til mín tveir strákar sem keyptu byssur af Guðjóni. Ég breytti báðum rifflunum í straightpull eins og þeir voru upphaflega skráðir en þetta voru hálfsjálfvirkir rifflar,“ segir Agnar Guðjónsson byssusmiður.

Byssurnar voru að hans sögn báðar hálfsjálfvirkar en um svipað leiti og mennirnir leituðu til hans hafði annar maður verið sakfelldur af Landsrétti fyrir að eiga ólöglegan riffil sem hann sagði Guðjón hafa selt sér í ólöglegri mynd. Að hans sögn hafði Guðjón talið honum trú um að þar sem byssan hefði verið flutt inn áður en lögum um skotvopn hefði verið breytt væri byssan lögleg.

„Hann vitnar í gömul lög að þær hafi verið fluttar inn áður en lögunum var breytt. Þetta var einhver svoleiðis skrípaleikur. En, hálfsjálfvirkir rifflar eins og þessir eru bannaðir.“

Segir óskiljanlegt að Guðjón hafi ekki fengið stöðu sakbornings

Málið kom upp í Reykjavík en Sigríður Björk var þá lögreglustjóri á höfuðborgarsvæðinu og þurfti embættið því að segja sig frá málinu. Með bréfi frá ríkissaksóknara í júlí 2018 var lögreglustjóranum á Vesturlandi falin meðferð málsins. Ákæra var svo gefin út í janúar 2019. 

Guðjón var aðeins vitni í málinu og segir lögmaður mannsins sem var dæmdur í samtali við fréttastofu að það sé óskiljanlegt að Guðjón hafi ekki fengið réttarstöðu sakbornings og að rannsóknin hafi aðeins verið skuggi af því sem hún hefði átt að vera.

Af dómsgögnum að dæma hélt maðurinn því fram allt frá fyrstu skýrslutöku að Guðjón hafi selt honum riffilinn í þeirri mynd sem hann fannst á heimili hans, sem hálfsjálfvirkt skotvopn. Rifillinn var af gerðinni AR-15, sem venjulega eru sjálfvirkir rifflar en hafði verið skráður þannig að hlaða þyrfti hverju skoti handvirkt í hlaupið.

„Það vildi enginn koma nálægt þessu máli hjá lögreglunni,“ segir Agnar. 

Þú varst aldrei spurður út í þína aðkomu?

„Nei, ég kem bara að þessu með því að breyta þessu fyrir strákana svo byssurnar væru löglegar. Þannig þær yrðu ekki teknar af þeim. Það er lítill áhugi hjá lögreglunni að rannsaka þetta mál.“

Vill vita hvaða lögregluembætti hefur gefið Guðjóni leyfi fyrir innflutningi

En hvernig virkar hálfsjálfvirk byssa? Í stað þess að hlaða þurfi hverri kúlu handvirkt í hlaup vopnsins, milli þess sem tekið er í gikkinn, hleður skotvopnið næstu kúlu sjálft og flýtir þannig fyrir skotmanninum.

Agnar segist ekki hafa verið spurður út í málið af lögreglunni. 

„En ég hef ekki farið leynt með það að ég sé búinn að breyta tveimur byssum svo þær séu eins og þær eiga að vera,“ segir Agnar. 

„Það væri gaman að sjá hver hafi skrifað undir alla þessa pappíra fyrir því sem Guðjón hefur verið að flytja inn. Það þarf samþykki frá lögregluembætti, það er spurning hvaða embætti það hefur verið.“